ຫວຽດນາມ-ລາວ ລາດຕະເວນປົກປັກຮັກສາເສັ້ນຊາຍແດນ
ກປ.ອອນໄລ - ແຕ່ວັນທີ 19-21 ທັນວາ, ຄ້າຍທະຫານຊາຍແດນຕາມເຮີບ, ທະຫານຊາຍແດນແຂວງເງະອານ ໄດ້ສົມທົບກັບກອງຮ້ອຍທະຫານຊາຍແດນ 251, ກອງບັນຊາການທະຫານແຂວງບໍລິຄໍາໄຊ (ປະເທດລາວ) ຈັດຕັ້ງການລາດຕະເວນສອງຝ່າຍ, ກວດກາລະບົບເສັ້ນຊາຍແດນ, ຫຼັກໝາຍຊາຍແດນ ເພື່ອປົກປັກຮັກສາເສັ້ນຊາຍແດນ ຫວຽດນາມ-ລາວ.
|
|
ຜູ້ບັນຊາການຄ້າຍທະຫານຊາຍແດນຕາມເຮີບ ຊາບຊຶມໜ້າທີ່ໃຫ້ກໍາລັງລາດຕະເວນ. ພາບ: bienphong.com.vn. |
ກໍາລັງລາດຕະເວນສອງຝ່າຍ ໄດ້ດໍາເນີນການລາດຕະເວນເສັ້ນຊາຍແດນ ຫວຽດນາມ-ລາວ ແຕ່ເຂດຫຼັກໝາຍຊາຍແດນເລກທີ 426 (ມີຄວາມສູງ 1.528 ແມັດ ເມື່ອທຽບໃສ່ລະດັບໜ້ານໍ້າທະເລ) ໄປຮອດຫຼັກໝາຍຊາຍແດນເລກທີ 426/2 (ມີຄວາມສູງ 1.766 ແມັດ ເມື່ອທຽບໃສ່ລະດັບໜ້ານໍ້າທະເລ). ເສັ້ນຊາຍແດນຕອນນີ້ມີຄວາມຍາວ 7,083 ກິໂລແມັດ. ສິ້ນສຸດການລາດຕະເວນເສັ້ນຊາຍແດນຕອນນີ້, ສອງຝ່າຍສືບຕໍ່ດໍາເນີນການລາດຕະເວນ ແຕ່ເຂດຫຼັກໝາຍຊາຍແດນເລກທີ 426 ໄປຮອດຫຼັກໝາຍຊາຍແດນເລກທີ 425 ດ້ວຍຄວາມຍາວ 3,862 ກິໂລແມັດ.
|
|
ກອງລາດຕະເວນ ຄ້າຍທະຫານຊາຍແດນຕາມເຮີບ ຢູ່ຫຼັກໝາຍຊາຍແດນເລກທີ 425. ພາບ: bienphong.com.vn. |
ກໍາລັງສອງຝ່າຍໄດ້ແກ້ໄຂຄວາມຫຍຸ້ງຍາກກ່ຽວກັບສະພາບດິນຟ້າອາກາດ ແລະພູມີປະເທດທຸລະກັນດານເພື່ອດຳເນີນການກວດກາສະພາບຫຼັກໝາຍຊາຍແດນ, ແລກປ່ຽນບັນດາເນື້ອໃນທີ່ກ່ຽວຂ້ອງເຖິງວຽກງານປົກປັກຮັກສາຊາຍແດນ. ຜ່ານການລາດຕະເວນ, ໝາກຜົນປະກົດວ່າ, ສັນຍານເສັ້ນຊາຍແດນບໍ່ຖືກເຄື່ອນຍ້າຍ, ຫຼັກໝາຍຊາຍແດນໄດ້ຮັບປະກັນຢູ່ໃນສະພາບເດີມ, ປອດໄພ.
|
|
ແຕ່ລະເດືອນ, ສອງກົມກອງດໍາເນີນການລາດຕະເວນຮ່ວມໜຶ່ງຄັ້ງ. ພາບ: bienphong.com.vn. |
ພາຍຫຼັງສິ້ນສຸດການລາດຕະເວນ, ສອງຝ່າຍໄດ້ຈັດຕັ້ງການປະຊຸມເພື່ອຖອດຖອນບົດຮຽນ, ແລກປ່ຽນບາງເນື້ອໃນ, ລົງນາມໃນບົດບັນທຶກ ແລະເຫັນດີເປັນເອກະພາບໃຫ້ການລາດຕະເວນຄັ້ງຕໍ່ໄປ.
ໂດຍ: ທູຈາງ