ຫວຽດນາມ ໃຫ້ຄໍາໝັ້ນສັນຍາປະຕິບັດບັນດາຂໍ້ກໍານົດຂອງ UNCLOS 1982 ຢ່າງຄົບຖ້ວນ
ກປ.ອອນໄລ - ໃນລະຫວ່າງວັນທີ 11-14 ມິຖຸນາ, ຢູ່ສໍານັກງານສະຫະປະຊາຊາດຢູ່ ນິວຢອກ, ໄດ້ດໍາເນີນກອງປະຊຸມບັນດາປະເທດສະມາຊິກໃນສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລ 1982 ຄັ້ງທີ 28 (UNCLOS 1982).
ກ່າວຄໍາເຫັນທີ່ກອງປະຊຸມ, ທ່ານນາງເອກອັກຄະລັດຖະທູດ ຫງວຽນເຟືອງງາ , ຫົວໜ້າຄະນະຜູ້ຕາງໜ້າຫວຽດນາມ ປະຈຳສະຫະປະຊາຊາດ, ຊີ້ແຈ້ງວ່າ: ຫວຽດນາມ ຍາມໃດກໍ່ມີແຜນນະໂຍບາຍແກ້ໄຂບັນດາການຂັດແຍ້ງກັນຢູ່ທະເລຕາເວັນອອກໂດຍສັນຕິວິທີ, ສອດຄ່ອງກັບກົດໝາຍສາກົນ, ໃນນັ້ນມີ UNCLOS 1982. ຫວຽດນາມ ຊົມເຊີຍຄວາມມານະພະຍາຍາມລວມຂອງບັນດາປະເທດທີ່ກ່ຽວຂ້ອງ ເພື່ອແນໃສ່ສ້າງທະເລຕາເວັນອອກກາຍເປັນເຂດທະເລແຫ່ງສັນຕິພາບ, ສະຖຽນລະພາບ ແລະພັດທະນາແບບຍືນຍົງ, ໃນນັ້ນມີການເຈລະຈາກ່ຽວກັບກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC).
|
|
ທ່ານນາງເອກອັກຄະລັດຖະທູດ ຫງວຽນເຟືອງງາ, ຫົວໜ້າຄະນະຜູ້ຕາງໜ້າຫວຽດນາມ ປະຈຳສະຫະປະຊາຊາດ. ພາບ: baophapluat.vn. |
ຫວຽດນາມ ຮຽກຮ້ອງໃຫ້ບັນດາປະເທດສະມາຊິກທັງໝົດຕ້ອງເຄົາລົບບັນດາຂໍ້ກໍານົດຂອງ UNCLOS 1982 ຢ່າງຄົບຖ້ວນ, ເຄົາລົບບັນດາວິວັດທະນາການທາງການທູດ ແລະນິຕິກໍາ, ຊຸກຍູ້ການນໍາໃຊ້ທະເລ ແລະມະຫາສະໝຸດແບບຍືນຍົງ, ຮັບປະກັນຄວາມໝັ້ນຄົງ, ຄວາມປອດໄພ, ຄວາມເສລີໃນການເດີນທະເລ, ການບິນຢູ່ບັນດາເຂດທະເລ, ຫຼີກລ້ຽງບັນດາການເຄື່ອນໄຫວພຽງລຳພັງຝ່າຍດຽວ, ໃນນັ້ນມີການເຄື່ອນໄຫວຫັນບັນດາໂຄງປະກອບທີ່ພວມຢຶດຄອງເປັນການທະຫານ, ໄປຝືນກັບເປົ້າໝາຍຂອງ UNCLOS 1982, ສ້າງຜົນສະທ້ອນທີ່ຫຍໍ້ທໍ້ເຖິງສິ່ງແວດລ້ອມ ແລະຊັບພະຍາກອນທະເລ, ກໍ່ຄືສິດ, ຜົນປະໂຫຍດອັນຊອບທຳ, ຖືກຕ້ອງຕາມກົດໝາຍຂອງບັນດາປະເທດຕາມ UNCLOS 1982 ແລະວິວັດທະນາການສ້າງບັນດາກົດແຫ່ງການປະພຶດ. ທ່ານນາງ ຫງວຽນເຟືອງງາ ເນັ້ນໜັກວ່າ, ຫວຽດນາມ ໃຫ້ຄໍາໝັ້ນສັນຍາເຄົາລົບ ແລະປະຕິບັດບັນດາຂໍ້ກໍານົດຂອງ UNCLOS 1982 ຢ່າງຄົບຖ້ວນ, ຮ່ວມມືກັບບັນດາປະເທດ, ອົງການຈັດຕັ້ງສາກົນເພື່ອອະນຸລັກຮັກສາ ແລະພັດທະນາທະເລ ແລະມະຫາສະໝຸດແບບຍືນຍົງ ເພື່ອອະນາຄົດລວມຂອງມວນມະນຸດ.
ແປໂດຍ: ເກື່ອງດັ້ງ