ລາວ-ຫວຽດນາມ ທົບທວນການປະຕິບັດສັນຍາວ່າດ້ວຍລະບຽບການຊາຍແດນ
ໃນວັນທີ 10 ທັນວາ 2018 ຄະນະຜູ້ແທນຊາຍແດນ ລາວ-ຫວຽດນາມ ໄດ້ຈັດກອງປະຊຸມສາມັນປະຈຳປີຄັ້ງທີ XXVIII ຂຶ້ນທີ່ນະຄອນຫລວງວຽງຈັນ ເຊິ່ງຝ່າຍລາວ ນຳໂດຍທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດແຫ່ງສປປ ລາວ ແລະຝ່າຍຫວຽດນາມ ນຳໂດຍ ທ່ານ ເລຮວ່າຍຈຸງ ຮອງລັດຖະມົນຕີ ກະຊວງການຕ່າງປະເທດ ສສ ຫວຽດນາມ, ມີບັນດາຮອງເຈົ້າແຂວງທີ່ມີຊາຍແດນຕິດຈອດຂອງສອງປະເທດ ພ້ອມດ້ວຍຂະແໜງການກ່ຽວຂ້ອງເຂົ້າຮ່ວມ.
ກອງປະຊຸມຄັ້ງນີ້ໄດ້ທົບທວນຄືນການຮ່ວມມືຈັດຕັ້ງປະຕິບັດສັນຍາວ່າດ້ວຍລະບຽບການຊາຍແດນ ແລະດ່ານຊາຍແດນປະເທດລາວ-ຫວຽດນາມ ແລະບົດບັນທຶກກອງປະຊຸມຂອງຄະນະຜູ້ແທນຊາຍແດນ ລາວ-ຫວຽດນາມ ຄັ້ງທີ XXVII ໃນໜຶ່ງປີຜ່ານມາ, ເຊິ່ງສອງຝ່າຍໄດ້ສັງເກດຕີລາຄາຄືນດ້ານຕັ້ງໜ້າ ແລະດ້ານຫຍໍ້ທໍ້ຕ່າງໆກ່ຽວກັບວຽກງານການຄຸ້ມຄອງຊາຍແດນ, ການພັດທະນາເສດຖະກິດ, ການຄ້າ, ວັດທະນະທຳ ແລະທ່ອງທ່ຽວຊາຍແດນ. ພ້ອມນີ້ຍັງມີການທົບທວນການເຊື່ອມຕໍ່ເສັ້ນທາງຄົມມະນາຄົມ, ການເຮັດທົດລອງການກວດກາ "ປະຕູດຽວ-ຢຸດເທື່ອດຽວ" ຢູ່ດ່ານສາກົນແດນສະຫວັນ-ລາວບາວ, ລວມທັງການປະຕິບັດຂໍ້ຕົກລົງຂັ້ນລັດຖະບານ ກ່ຽວກັບການແກ້ໄຂບັນຫາຜູ້ຍົກຍ້າຍ ຕັ້ງພູມລຳເນົາຕາມລຳພັງໃຈ ແລະສ້າງຄອບຄົວບໍ່ຖືກລະບຽບຢູ່ຕາມບໍລິເວນຊາຍແດນລາວ-ຫວຽດນາມ.
|
|
ບັນຍາກາດທີ່ການເຮັດວຽກ. ພາບ: kpl.gov.la. |
ສອງຝ່າຍໄດ້ຕີລາຄາສູງຕໍ່ການປະຕິບັດຫນ້າທີ່ຂອງອົງການຊາຍແດນ ແລະເຈົ້າຫນ້າທີ່ຊາຍແດນນັບແຕ່ຂັ້ນສູນກາງລົງຮອດທ້ອງຖິ່ນທີ່ໄດ້ເປັນເຈົ້າການປະກອບສ່ວນຢ່າງຕັ້ງຫນ້າເຂົ້າໃນວຽກງານຄຸ້ມຄອງຄວາມເປັນລະບຽບຮຽບຮ້ອຍຢູ່ຕາມບໍລິເວນຊາຍແດນລະຫວ່າງສອງປະເທດ ເຊິ່ງເປັນການປະກອບສ່ວນຢ່າງຕັ້ງຫນ້າເຂົ້າໃນການເພີ່ມທະວີສາຍພົວພັນ ມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ ແລະການ ຮ່ວມມືຮອບດ້ານລະຫວ່າງສອງຊາດລາວ-ຫວຽດນາມ. ທັງນີ້ເພື່ອສ້າງຊາຍແດນຂອງສອງປະເທດໃຫ້ກາຍເປັນຊາຍແດນແຫ່ງສັນຕິພາບ, ມິດຕະພາບ ແລະການຮ່ວມມືພັດທະນາແບບຍືນຍົງຕະຫລອດການ.
ຄະນະຜູ້ແທນຊາຍແດນລາວ-ຫວຽດນາມ ຍັງໄດ້ເປັນເອກະພາບກັນວາງທິດທາງແຜນການປະຕິບັດວຽກງານໃນຕໍ່ຫນ້າກ່ຽວກັບວຽກງານຄຸ້ມຄອງຊາຍແດນລະຫວ່າງສອງປະເທດໂດຍຈະສຸມໃສ່ວຽກງານໂຄສະນາເຜີຍແຜ່ລະບຽບການຄຸ້ມຄອງຊາຍແດນ, ການປົກປັກຮັກສາເສັ້ນຊາຍແດນ ແລະຫລັກໝາຍຊາຍແດນສອງປະເທດໃຫ້ປະຊາຊົນຢູ່ຕາມບໍລິເວນຊາຍແດນເຂົ້າໃຈແຈ້ງກ່ຽວກັບເຂດອຳນາດອະທິປະໄຕ ແລ ຜືນແຜ່ນດິນອັນຄົບຖ້ວນຂອງຊາດ. ພ້ອມນີ້ສອງຝ່າຍຈະເພີ່ມທະວີບັນດາມາດຕະການຊຸກຍູ້ໃຫ້ເສດຖະກິດ, ການຄ້າ, ວັດທະນະທຳ, ການທ່ອງທ່ຽວ ຢູ່ຕາມບໍລິເວນຊາຍແດນໃຫ້ມີການຂະຫຍາຍຕົວ, ຂຶ້ນແຜນຍຸດທະສາດ ແລະພັດທະນາດ່ານ ແຕ່ນີ້ຮອດປີ 2025 ແລະວິໄສທັດຮອດປີ 2035; ເພີ່ມທະວີການຈັດຕັ້ງປະຕິບັດຂໍ້ຕົກລົງລະດັບລັດຖະບານວ່າດ້ວຍການແກ້ໄຂບັນຫາຜູ້ຍົກຍ້າຍຕັ້ງພູມລຳເນົາຕາມລຳພັງໃຈ ແລະສ້າງຄອບຄົວບໍ່ຖືກລະບຽບຢູ່ຕາມບໍລິເວນຊາຍແດນລາວ-ຫວຽດນາມ ໃຫ້ບັນລຸຕາມເປົ້ທໝາຍທີ່ວາງໄວ້.
ຂ່າວ: ສົມຫວັງ ພາຍອ່າຍຄຳ