ທະຫານເຮືອຫວຽດນາມ ແລະຟິລິບປິນ ຈັດຕັ້ງການພົບປະແລກປ່ຽນຢູ່ເກາະຊອງຕືດົງ

12 ພະຈິກ 2018 20:39

ກປ.ອອນໄລ - ວັນທີ 10 ພະຈິກ, ທີ່ເກາະຊອງຕືດົງ ໄດ້ດຳເນີນລາຍການພົບປະແລກ ປ່ຽນບຸກຄະລາກອນ ຄັ້ງທີ 4 ລະຫວ່າງກຳລັງທະຫານເຮືອຫວຽດນາມ ແລະທະຫານເຮືອຟິລິບປິນ. ຄະນະຫວຽດນາມໂດຍທ່ານພັນເອກພິເສດ ຫງວຽນຫວ໊ຽດທວນ, ຮອງຜູ້ບັນຊາການທະຫານເຮືອເຂດ 4 ເປັນຫົວໜ້າຄະນະ. ຄະນະຟິລິບປິນ ໂດຍທ່ານພັນເອກ Carlos Sabarre, ຫົວໜ້າບັນຊາການກໍາລັງທະຫານເຮືອປະຕິບັດໜ້າທີ່ ພິເສດ 41 ເປັນຫົວໜ້າຄະນະ.

ໂດຍຕາງໜ້າຄະນະຫວຽດນາມ, ທ່ານພັນເອກພິເສດ ຫງວຽນຫວ໊ຽດທວນ ຢືນຢັນວ່າ: “ໃນຊຸມປີຜ່ານມາ, ການພົວພັນລະຫວ່າງສອງປະເທດໄດ້ ແລະກຳລັງພັດທະນາອັນດີງາມໃນທຸກຂົງເຂດ. ຫວຽດນາມ ແລະຟິລິບປິນ ຍາມໃດກໍ່ສະໜັບສະໜູນເຊິ່ງກັນ ແລະກັນ ແລະມີທັດສະນະລວມກ່ຽວກັບຫຼາຍບັນຫາໃນພາກພື້ນ ແລະສາກົນ. ການພົວພັນຮ່ວມມືລະຫວ່າງທະຫານເຮືອສອງປະເທດກໍ່ມີຄວາມກ້າວໜ້າຫຼາຍຢ່າງບົນພື້ນຖານບົດບັນທຶກຊ່ວຍຈຳກ່ຽວກັບການເພີ່ມທະວີການຮ່ວມມືສອງຝ່າຍ ແລະແບ່ງປັນຂໍ້ມູນຂ່າວສານ. ກົນໄກພົບປະແລກປ່ຽນບຸກຄະລາກອນໄດ້ສ້າງເງື່ອນໄຂເປັນຢ່າງດີເພື່ອໃຫ້ທະຫານເຮືອສອງປະເທດພົບປະແລກປ່ຽນ, ແບ່ງປັນບົດຮຽນໃນບັນດາຂົງເຂດທີ່ຕ່າງຝ່າຍຕ່າງມີຄວາມສົນໃຈ ເພື່ອແນໃສ່ເພີ່ມທະວີຄວາມໄວ້ເນື້ອເຊື່ອໃຈ, ຄວາມເຂົ້າອົກເຂົ້າໃຈເຊິ່ງກັນ ແລະກັນກວ່າອີກ, ປະກອບສ່ວນຮັກສາສັນຕິພາບ, ສະຖຽນລະພາບໃນພາກພື້ນ, ຊຸກຍູ້ການພົວພັນມິດຕະພາບ, ການຮ່ວມມືລະຫວ່າງທະຫານເຮືອເວົ້າສະເພາະ ແລະກອງທັບສອງປະເທດເວົ້າລວມ”.

ພາຍຫຼັງພິທີໄຂ, ສອງຄະນະໄດ້ດຳເນີນບັນດາການເຄື່ອນໄຫວພົບປະແລກປ່ຽນວັດທະນະທຳສິລະປະ ແລະແຂ່ງຂັນກິລາມິດຕະພາບ ຄື: ເຕະບານ, ບານສົ່ງ, ດຶງເຊືອກ...