ຫວຽດນາມ-ຝະລັ່ງ ເຊັນຖະແຫຼງການວິໄສທັດລວມກ່ຽວກັບການຮ່ວມມືດ້ານປ້ອງກັນຊາດໄລຍະ 2018-2028
ກປ.ອອນໄລ - ໂດຍຮັບຄຳເຊີນຂອງທ່ານນາງ Florence Parly, ລັດຖະມົນຕີກະຊວງປ້ອງກັນປະເທດ ສ.ຝະລັ່ງ, ຄະນະຜູ້ແທນການທະຫານຫວຽດນາມ ໂດຍທ່ານພົນເອກ ໂງຊວນລິກ, ກຳມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ນຳໜ້າໄປຢ້ຽມຢາມ ສ.ຝະລັ່ງ ຢ່າງເປັນທາງການແຕ່ວັນທີ 15-20 ກັນຍາ.
ທີ່ການພົບປະເຈລະຈາ, ສອງຝ່າຍໄດ້ແລກປ່ຽນສະຖານະການສາກົນ ແລະພາກພື້ນເຊິ່ງຕ່າງຝ່າຍຕ່າງມີຄວາມສົນໃຈ. ທ່ານນາງລັດຖະມົນຕີກະຊວງປ້ອງກັນປະເທດຝະລັ່ງ ຢືນຢັນວ່າ, ຝະລັ່ງ ມີທັດສະນະຄ້າຍຄືກັນກັບຫຼາຍປະເທດກ່ຽວກັບການຮັບປະກັນຄວາມສະຫງົບ, ຄວາມປອດໄພ ແລະຄວາມເສລີໃນການເດີນທະເລ, ທາງອາກາດບົນຈິດໃຈເຄົາລົບກົດໝາຍສາກົນ ແລະຝະລັ່ງ ຈະສືບຕໍ່ມີບັນດາການປະກອບສ່ວນເຂົ້າໃນການຮັກສາສະພາບແວດລ້ອມສັນຕິພາບ, ສະຖຽນລະພາບ ແລະການພັດທະນາຢູ່ພາກພື້ນເຊິ່ງ ຝະລັ່ງ ມີຜົນປະໂຫຍດ. ລັດຖະມົນຕີສອງທ່ານເຫັນດີເປັນເອກະພາບໂດຍຖືວ່າ, ບັນດາການຂັດແຍ້ງກັນຄວນໄດ້ແກ້ໄຂໂດຍສັນຕິວິທີຕາມກົດໝາຍສາກົນ, ໃນນັ້ນມີສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລ ປີ 1982.
    |
 |
|
ທ່ານນາງ Florence Parly, ລັດຖະມົນຕີກະຊວງປ້ອງກັນປະເທດ ສ.ຝະລັ່ງ ເປັນປະທານພິທີຕ້ອນຮັບທ່ານ ໂງຊວນລິກ, ລັດຖະມົນຕີກະຊວງປ້ອງກັນປະເທດຫວຽດນາມ. ພາບ: ທູຈາງ. |
ກ່ຽວກັບການພົວພັນລະຫວ່າງສອງປະເທດ, ທ່ານລັດຖະມົນຕີ ໂງຊວນລິກ ຢັ້ງຢືນວ່າ, ຝະລັ່ງ ແມ່ນຄູ່ຮ່ວມມືສຳຄັນຂອງ ຫວຽດນາມ. ຫວຽດນາມ ຖືເປັນສຳຄັນບົດບາດຂອງ ຝະລັ່ງ ໃນເວທີສາກົນ, ສະໜັບສະໜູນ ຝະລັ່ງ ເພີ່ມທະວີການຮ່ວມມື, ທັງສອງຝ່າຍ ແລະຫຼາຍຝ່າຍ, ກັບບັນດາປະເທດອາຊຽນ ກໍ່ຄື ເຂົ້າຮ່ວມບັນດາກົນໄກ ອາຊຽນ; ປາດຖະໜາຢາກໃຫ້ ຝະລັ່ງ ສືບຕໍ່ຕັ້ງໜ້າປະກອບສ່ວນສ້າງສັນຕິພາບ, ສະຖຽນລະພາບ ແລະພັດທະນາຢູ່ພາກພື້ນ.
|
|
 |
|
ທ່ານ ໂງຊວນລິກ, ລັດຖະມົນຕີກະຊວງປ້ອງກັນປະເທດຫວຽດນາມ ແລະທ່ານນາງ Florence Parly, ລັດຖະມົນຕີກະຊວງປ້ອງກັນປະເທດ ສ.ຝະລັ່ງ. ພາບ: ທູຈາງ. |
|
|
 |
|
ທ່ານ ໂງຊວນລິກ, ລັດຖະມົນຕີກະຊວງປ້ອງກັນປະເທດຫວຽດນາມ ແລະທ່ານນາງ Florence Parly, ລັດຖະມົນຕີກະຊວງປ້ອງກັນປະເທດ ສ.ຝະລັ່ງ ເຊັນຖະແຫຼງການວິໄສທັດລວມກ່ຽວກັບການຮ່ວມມືດ້ານປ້ອງກັນຊາດໄລຍະ 2018-2028. ພາບ: ທູຈາງ. |
ລັດຖະມົນຕີສອງທ່ານຕີລາຄາສູງບັນດາບາດກ້າວພັດທະນາຢ່າງຕັ້ງໜ້າໃນການພົວພັນຮ່ວມມືດ້ານປ້ອງກັນຊາດຫວຽດນາມ-ຝະລັ່ງ ໃນໄລຍະຜ່ານມາ; ຖືວ່າ, ການພົວພັນດ້ານປ້ອງກັນຊາດແມ່ນໜຶ່ງໃນບັນດາເສົາຄ້ຳຂອງການພົວພັນຄູ່ຮ່ວມມືຍຸດທະສາດລະຫວ່າງສອງປະເທດ. ພິເສດ, ນັບແຕ່ພາຍຫຼັງ ຫວຽດນາມ ແລະຝະລັ່ງ ຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດ, ສອງປະເທດໄດ້ສະຫງວນຄວາມເອົາໃຈໃສ່ເພື່ອພັດທະນາການພົວພັນຮ່ວມມືດ້ານປ້ອງກັນຊາດຫຼາຍກວ່າອີກ ແລະບັນລຸໄດ້ໝາກຜົນແທດຈິງໃນບັນດາຂົງເຂດ: ແລກປ່ຽນທັດສະນະຍຸດທະສາດ, ບຳລຸງສ້າງ, ຮັກສາສັນຕິພາບສະຫະປະຊາຊາດ, ອຸດສາຫະກຳດ້ານປ້ອງກັນຊາດ, ເສນາຮັກ, ແລກປ່ຽນບົດຮຽນລະຫວ່າງບັນດາເຫຼົ່າທັບ.
ໂດຍ: ແສງເດືອນ