ງານພົບປະສັງສັນສະເຫຼີມສະຫຼອງ 40 ປີແຫ່ງວັນສ້າງຕັ້ງຄະນະນັກຊ່ຽວຊານການທະຫານ 478 ກະຊວງປ້ອງກັນປະເທດ
ກປ.ອອນໄລ - ວັນທີ 21 ເມສາ, ຢູ່ຮ່າໂນ້ຍ, ຄະນະຕິດຕໍ່ກັບອະດີດນັກຊ່ຽວຊານການທະຫານ ກະຊວງປ້ອງກັນປະເທດ ແລະສະມາຄົມມິດຕະພາບ ຫວຽດນາມ-ກໍາປູເຈຍ ໄດ້ຈັດຕັ້ງງານພົບປະສັງສັນສະເຫຼີມສະຫຼອງ 40 ປີແຫ່ງວັນສ້າງຕັ້ງຄະນະນັກຊ່ຽວ ຊານການທະຫານ 478 ກະຊວງປ້ອງກັນປະເທດ (21-4-1978/21-4-2018).
ເຂົ້າຮ່ວມງານພົບປະສັງສັນມີທ່ານ ຫວູແອວງ, ອະດີດກໍາມະການກົມການເມືອງ, ອະດີດຫົວໜ້າຄະນະຂົນຂວາຍປະຊາຊົນສູນກາງ; ທ່ານພົນຕີ ເລຮ່ຽນເວີນ, ຮອງຫົວໜ້າກົມໃຫຍ່ການເມືອງ; ທ່ານພົນຕີ ເລວັນເຮິນ, ອະດີດຮອງຫົວໜ້າກົມໃຫຍ່ການເມືອງ, ປະທານສະມາຄົມໜູນຊ່ວຍ ຄອບຄົວ ນັກຮົບເສຍສະຫຼະຊີວິດເພື່ອຊາດຫວຽດນາມ.
ໃນວັນທີ 21 ເມສາ 1978, ອີງຕາມແຜນນະໂຍບາຍສຳລັບພັນທະສາກົນຂອງພັກກອມມູນິດຫວຽດນາມ, ທ່ານພົນເອກ ຫວໍງວຽນຢາບ, ເລຂາຄະນະພັກການທະຫານສູນກາງ ໄດ້ລົງນາມໃນຂໍ້ຕົກລົງ ເລກທີ 34/QĐ-QU, ສ້າງຕັ້ງຄະນະຮັບຜິດຊອບວຽກງານ Z - ປະຈຸບັນແມ່ນຄະນະນັກຊ່ຽວຊານການທະຫານ 478 (ກອງ 478).
|
|
ບັນດາຜູ້ແທນຖ່າຍຮູບເປັນທີ່ລະນຶກທີ່ງານພົບປະສັງສັນ. ພາບ: qdnd.vn. |
ກວ່າ 10 ປີທີ່ເຄື່ອນໄຫວຢູ່ປະເທດ ກໍາປູເຈຍ, ພະນັກງານ, ນັກຊ່ຽວຊານ ກອງ 478 ໄດ້ຕັ້ງໜ້າ, ເປັນເຈົ້າການເສີມຂະຫຍາຍກໍາລັງຄວາມສາມາດ, ຊ່ວຍກະຊວງປ້ອງກັນປະເທດ ກໍາປູເຈຍ ສ້າງຕັ້ງບັນດາອົງການເສນາທິການ, ການເມືອງ, ພະລາທິການ, ເຕັກນິກ; ແນະນໍາ, ຊ່ວຍເຫຼືອພະນັກງານທຸກຂັ້ນຂອງປະເທດເພື່ອນມິດ. ກອງ 478 ຍັງປະກອບສ່ວນຊ່ວຍ ກໍາປູເຈຍ ສ້າງບັນດາແຜນນະໂຍບາຍ, ນະໂຍບາຍ, ປະກາດໃຊ້ບັນດາຄຳສັ່ງແນະນຳ, ຄຳສັ່ງ, ຂໍ້ຕົກລົງກ່ຽວກັບແຜນການສູ້ຮົບ, ປະຕິບັດຄວາມປອງດອງຊາດ, ສ້າງສາປະເທດ ກໍາປູເຈຍ ຈະເລີນຮຸ່ງເຮືອງ. ສຳເລັດໜ້າທີ່, ກອງ 478 ໄດ້ຮັບຫຼຽນໄຊ ໂຮ່ຈິມິນ ຈາກພັກ, ລັດຫວຽດນາມ.
ທີ່ງານພົບປະສັງສັນ, ບັນດາຜູ້ແທນໄດ້ພ້ອມກັນຫວນຄືນມູນເຊື້ອທີ່ສະຫງ່າລາສີຂອງກອງ ກໍ່ຄື ແບ່ງປັນບັນດາອະນຸສອນເມື່ອຍັງປະຕິບັດງານ, ພ້ອມທັງລະດົມກໍາລັງໃຈກັນສືບຕໍ່ສູ້ຊົນ, ກາຍເປັນກຳລັງແກ່ນສານຕັ້ງໜ້າໃນການກໍ່ສ້າງ, ເພີ່ມພູນຄູນສ້າງອາລົມຈິດສາກົນຂອງຫວຽດນາມ ກັບເພື່ອນມິດສາກົນ.
ແປໂດຍ: ກວຽດເຕີມ