ທ່ານພົນເອກ ໂງຊວນລິກ ຕ້ອນຮັບລັດຖະມົນຕີຮັບຜິດຊອບກະຊວງພາຍໃນ ກໍາປູເຈຍ
ກປ.ອອນໄລ - ຕອນເຊົ້າວັນທີ 14 ມີນາ, ຢູ່ສໍານັກງານກະຊວງປ້ອງກັນປະເທດ, ທ່ານພົນເອກ ໂງຊວນລິກ, ກໍາມະການກົມການເມືອງ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດຫວຽດນາມ ໄດ້ໃຫ້ການຕ້ອນຮັບທ່ານພົນເອກ Teng Savong, ລັດຖະມົນຕີຮັບຜິດຊອບກະຊວງພາຍໃນ ກໍາປູເຈຍ, ພວມຢ້ຽມຢາມ ແລະເຮັດວຽກຢູ່ຫວຽດນາມ.
ທ່ານພົນເອກ Teng Savong ແຈ້ງໃຫ້ທ່ານພົນເອກ ໂງຊວນລິກ ຮັບຊາບບາງຈຸດຕົ້ນຕໍກ່ຽວກັບສະພາບການດ້ານເສດຖະກິດ, ການເມືອງ, ສັງຄົມຂອງກໍາປູເຈຍ ໃນປະຈຸບັນກໍ່ຄືໝາກຜົນແຫ່ງການຮ່ວມມືລະຫວ່າງກະຊວງພາຍໃນ ກໍາປູເຈຍ ແລະພະແນກກົດລັບລັດຖະບານຫວຽດນາມ ໃນໄລຍະຜ່ານມາ. ທ່ານພົນເອກ Teng Savong ສະແດງຄວາມຂອບໃຈຕໍ່ການຊ່ວຍເຫຼືອຂອງຝ່າຍຫວຽດນາມ ສະຫງວນໃຫ້ກໍາປູເຈຍ ໃນດ້ານຕ່າງໆ, ໃນນັ້ນມີຂົງເຂດກົດລັບ.
|
|
ທ່ານພົນເອກ ໂງຊວນລິກ, ລັດຖະມົນຕີກະຊວງປ້ອງກັນປະເທດຫວຽດນາມ ຕ້ອນຮັບທ່ານພົນເອກ Teng Savong, ລັດຖະມົນຕີຮັບຜິດຊອບກະຊວງພາຍໃນ ກໍາປູເຈຍ. ພາບ: ຮວ່າງຫວູ໊. |
ສ່ວນທ່ານພົນເອກ ໂງຊວນລິກ ຊົມເຊີຍບັນດາຜົນງານເຊິ່ງກໍາປູເຈຍ ບັນລຸໄດ້ໃນບັນດາຂົງເຂດເສດຖະກິດ, ການເມືອງ, ສັງຄົມ. ຕີລາຄາສູງໝາກຜົນການຮ່ວມມືລະຫວ່າງຂະແໜງກົດລັບສອງປະເທດໃນໄລຍະຜ່ານມາ, ທ່ານພົນເອກ ໂງຊວນລິກ ສະເໜີໃນໄລຍະຈະມາເຖິງ, ສອງຝ່າຍຄວນສືບຕໍ່ຍູ້ແຮງການຮ່ວມມື, ໃນນັ້ນເອົາໃຈໃສ່ເປັນພິເສດເຖິງການແລກປ່ຽນຄະນະຜູ້ແທນ, ບໍາລຸງສ້າງ, ຝຶກອົບຮົມພະນັກງານ, ຜ່ານນັ້ນປະກອບສ່ວນຮັດແໜ້ນສາຍພົວພັນສາມັກຄີ, ບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງຍາວນານລະຫວ່າງຫວຽດນາມ ແລະກໍາປູເຈຍ ກວ່າອີກ.
ທ່ານພົນເອກ ໂງຊວນລິກ ຢືນຢັນວ່າ ກະຊວງປ້ອງກັນປະເທດຫວຽດນາມ ຍາມໃດກໍ່ສ້າງເງື່ອນໄຂສະດວກເພື່ອໃຫ້ຂະແໜງກົດລັບສອງປະເທດຮ່ວມມືຢ່າງມີປະສິດທິຜົນ, ຮັບໃຊ້ໃຫ້ພາລະກິດການປ້ອງກັນຊາດ-ປ້ອງກັນຄວາມສະຫງົບຂອງແຕ່ລະປະເທດ.
ແປໂດຍ: ກວຽດເຕິມ