ທ່ານພົນໂທ ເລຈຽມ ຢ້ຽມຢາມ, ມອບຂອງຂວັນປີໃໝ່ໃຫ້ຄອບຄົວນະໂຍບາຍ ຢູ່ແຂວງ ກວາງນາມ ແລະນະຄອນດ່າໜັ້ງ
ກປ.ອອນໄລ - ຕອນເຊົ້າວັນທີ 11 ກຸມພາ, ທ່ານພົນໂທ ເລຈຽມ, ຮອງລັດຖະມົນຕີກະຊວງປ້ອງກັນປະເທດຫວຽດນາມ ໄດ້ມາຢ້ຽມຢາມ, ມອບຂອງຂວັນໃຫ້ຄອບຄົວນະໂຍບາຍ, ຄອບຄົວປະສົບກັບຄວາມຫຍຸ້ງຍາກ ຢູ່ນະຄອນ ດ່າໜັ້ງ ແລະແຂວງ ກວາງນາມ ເນື່ອງໃນໂອກາດລະດູບານໃໝ່ປີຈໍ 2018.
ທ່ານພົນໂທ ເລຈຽມ ໄດ້ມອບຂອງຂວັນ 300 ພູດໃຫ້ບັນດາພົນທະຫານອອກຈາກກອງທັບ, ຄອບຄົວນະໂຍບາຍ ແລະຄອບ ຄົວທຸກຍາກຢູ່ຕາແສງ ຮວ່າເກື່ອງບັ໋ກ, ເມືອງ ຫ໊າຍເຈົາ, ນະຄອນດ່າໜັ້ງ ແລະບາງຕາແສງຂຶ້ນກັບເມືອງ ເກ໋ວເຊີນ ແລະເມືອງ ທັງບີ່ງ ແຂວງ ກວາງນາມ. ແຕ່ລະພູດມີມູນຄ່າ 500.000 ດົ່ງ, ລວມມີ: ເຂົ້າສານ, ແປ້ງນົວ, ນ້ຳມັນຄົວກິນ, ເຂົ້າໜົມ ແລະເງິນສົດ. ລວມມູນຄ່າ150 ລ້ານດົ່ງ.
|
|
ທ່ານພົນໂທ ເລຈຽມ, ຮອງລັດຖະມົນຕີກະຊວງປ້ອງກັນປະເທດຫວຽດນາມ ມອບຂອງຂວັນປີໃໝ່ 50 ພູດໃຫ້ພົນທະຫານອອກຈາກກອງທັບ, ຄອບຄົວນະໂຍບາຍ ແລະຄອບຄົວທຸກຍາກຢູ່ສອງຕາແສງ ເກ໋ວຮຽບ ແລະເກ໋ວລອງ, ເມືອງ ເກ໋ວເຊີນ, ແຂວງ ກວາງນາມ. ພາບ: ເຈິ່ນທົງ |
ກ່າວຄໍາເຫັນທີ່ການມອບຂອງຂວັນ, ທ່ານພົນໂທ ເລຈຽມ ຢັ້ງຢືນວ່າ: ລັດ, ລັດຖະບານ ຖືເປັນສໍາຄັນພິເສດເຖິງການເບິ່ງແຍງຊີວິດການເປັນຢູ່ຂອງປະຊາຊົນໃນໂອກາດວັນບຸນ, ປີໃໝ່. ສໍາລັບບັນດາກົມກອງໃນກອງທັບ, ກະຊວງປ້ອງກັນປະເທດໄດ້ຊີ້ນໍາຄະນະພັກ ແລະຜູ້ບັນຊາການທຸກຂັ້ນເພີ່ມທະວີການກໍາແໜ້ນສະພາບການໃນບໍລິເວນ, ຈັດຕັ້ງໃຫ້ພະນັກງານ, ນັກຮົບ ເຄື່ອນທັບໄປຍັງບັນດາທ້ອງຖິ່ນເຂດຫ່າງໄກສອກຫຼີກ, ເພື່ອຊ່ວຍເຫຼືອປະຊາຊົນ; ໜູນຊ່ວຍສະບຽງອາຫານເພື່ອໃຫ້ພໍ່ແມ່ປະຊາຊົນຕ້ອນຮັບລະດູບານໃໝ່, ເດັດດ່ຽວບໍ່ປະໃຫ້ຄອບຄົວໃດຖືກຂາດເຂີນອຶດຢາກໃນໂອກາດບຸນປີໃໝ່ປະຈໍາຊາດ.
ທ່ານພົນໂທ ເລຈຽມ ກໍ່ປາດຖະໜາວ່າການນໍາ, ອຳນາດການປົກຄອງບັນດາເມືອງ ເກ໋ວເຊີນ, ທັງບີ່ງ ແຂວງກວາງນາມ ສືບຕໍ່ເອົາໃຈໃສ່ຊ່ວຍເຫຼືອບັນດາພົນທະຫານອອກຈາກກອງທັບປະສົບກັບຄວາມຫຍຸ້ງຍາກ, ເບິ່ງແຍງຊີວິດການເປັນຢູ່ຂອງບັນດາເປົ້າໝາຍນະໂຍບາຍ ແລະຄອບຄົວທຸກຍາກເປັນຢ່າງດີກວ່າອີກ.
ແປໂດຍ: ເຈິ່ນຮວ່ຽນ