ເພີ່ມພູນຄູນສ້າງສາຍພົວພັນມິດຕະພາບມິດຕະພາບ ຫວຽດນາມ-ລາວ

ຫວ່າງແລ້ວນີ້, ທີ່ນະຄອນ ຕາມກີ (ແຂວງ ກວາງນາມ), ຄະນະຜູ້ແທນກອງບັນຊາການທະຫານແຂວງ ເຊກອງ (ລາວ) ໂດຍທ່ານພັນໂທ ທອງສີ ກຸນສະນະ ຫົວໜ້າການທະຫານກອງບັນຊາການແຂວງ ເຊກອງ ເປັນຫົວໜ້າຄະນະພົບປະເຈລະຈາກັບຄະນະຜູ້ແທນທະຫານຊາຍແດນ ສາມແຂວງ ກວາງນາມ, ກອນຕູມ ແລະເທື່ອທຽນເຫວ້ (ຫວຽດນາມ).

ຕາມຂໍ້ມູນຂ່າວສານທີ່ການພົບປະເຈລະຈາ, ປີ 2017, ສະພາບການອະທິປະໄຕ, ການປ້ອງກັນຄວາມສະຫງົບຢູ່ເສັ້ນຊາຍແດນຂອງແຂວງ ກວາງນາມ, ກອນຕູມ ແລະເທື່ອທຽນເຫວ້ ທີ່ຕິດກັບແຂວງ ເຊກອງ ຍາມໃດກໍ່ເປັນປົກກະຕິ. ກໍາລັງປົກປັກຮັກສາຊາຍແດນສອງຝ່າຍໄດ້ຈັດຕັ້ງການລາດຕະເວນສອງຝ່າຍ 29 ຄັ້ງໂດຍການເຂົ້າຮ່ວມຂອງພະນັກງານ, ນັກຮົບກວ່າ 600 ຄົນ; ສົມທົບກັນໃນວຽກງານຕ້ານ ແລະສະກັດກັ້ນອາດຊະຍາກຳ ແລະບັນດາການເຄື່ອນໄຫວແຊກຊຶມເຂົ້າຊາຍແດນຢ່າງແໜ້ນແຟ້ນ.

ບັນຍາກາດການພົບປະເຈລະຈາ. ພາບ: bienphong.com.vn

ພົ້ນເດັ່ນແມ່ນກອງບັນຊາການທະຫານຊາຍແດນແຂວງ ກວາງນາມ ໄດ້ເປັນເສນາທິການໃຫ້ແກ່ຄະນະກໍາມະການປະຊາຊົນແຂວງ ກວາງນາມ ຊ່ວຍ ລາວ ກໍ່ສ້າງປ້ອມກວດກາ ດັກຕ່າອອກ ດ້ວຍງົບປະມານການໃຊ້ຈ່າຍທັງໝົດແມ່ນ 48 ຕື້ດົ່ງ; ໜູນຊ່ວຍເຂົ້າສານໃຫ້ແກ່ປະຊາຊົນຢູ່ບັນດາບ້ານທີ່ຕິດກັບຊາຍແດນຈໍານວນ 8 ໂຕນ, ຮັບຊ່ວຍເຫຼືອນັກສຶກສາ 3 ຄົນຂອງປະເທດ ລາວ ດ້ວຍຈໍານວນເງິນໜູນຊ່ວຍປະຈໍາເດືອນແມ່ນ 500.000 ດົ່ງ/ຄົນ. ກອງບັນຊາການທະຫານຊາຍແດນແຂວງ ເທື່ອທຽນເຫວ້ ໄດ້ເປັນເສນາທິການໃຫ້ອຳນາດການປົກຄອງທ້ອງຖິ່ນໜູນຊ່ວຍເງິນຈໍານວນ 20 ລ້ານດົ່ງໃຫ້ກອງຮ້ອຍ 531 (ລາວ); ມອບຂອງຂວັນ 408 ພູດ ໃຫ້ແກ່ບັນດາຄອບຄົວຢູ່ຕິດກັບຊາຍແດນ; ຊ່ວຍເຫຼືອນັກສຶກສາ 4 ຄົນຂອງລາວ ດ້ວຍຈໍານວນເງິນໜູນຊ່ວຍແມ່ນ 500.000 ດົ່ງ/ຄົນ/ເດືອນ…

ບົນຈິດໃຈສາມັກຄີ, ມິດຕະພາບ, ສອງຝ່າຍໄດ້ແລກປ່ຽນ ແລະເຫັນດີເປັນເອກະພາບຕໍ່ທິດທາງສົມທົບປີ 2018, ນັ້ນແມ່ນການຮັກສາວຽກງານລາດຕະເວນສອງຝ່າຍ, ກວດກາບັນດາການເຄື່ອນໄຫວຜ່ານຊາຍແດນຢ່າງແໜ້ນແຟ້ນ. ສືບຕໍ່ເປັນເສນາທິການໃຫ້ອໍານາດການປົກຄອງທ້ອງຖິ່ນ ສສ ຫວຽດນາມ ແລະລັດຖະບານ ສປປ ລາວ ກ່ຽວກັບການແກ້ໄຂບັນຫາຜູ້ອົບພະຍົບຢ່າງເສລີໃນເຂດຊາຍແດນສອງປະເທດ.

ຄຽງຂ້າງນັ້ນ, ສືບຕໍ່ຮັກສາການແຈ້ງໃຫ້ຊາບ, ແລກປ່ຽນສະພາບການ, ສົມທົບກັນແກ້ໄຂບັນດາບັນຫາທີ່ກ່ຽວຂ້ອງເຖິງອະທິປະໄຕຜືນແຜ່ນດິນ, ຄວາມໝັ້ນຄົງຄວາມລະບຽບຮຽບຮ້ອຍຢູ່ເຂດຊາຍແດນ; ສົມທົບກັນໃນວຽກງານຕ້ານ ແລະສະກັດກັ້ນອາດຊະຍາກຳຢ່າງແໜ້ນແຟ້ນ; ຊ່ວຍເຫຼືອເຊິ່ງກັນ ແລະກັນເມື່ອມີໄພທໍາມະຊາດເກີດຂື້ນຢູ່ເຂດຊາຍແດນ…

ສິ້ນສຸດການພົບປະເຈລະຈາ, ການນໍາທະຫານຊາຍແດນ 3 ແຂວງ ກວາງນາມ, ກອນຕູມ, ເທື່ອທຽນເຫວ້ ແລະກອງບັນຊາການທະຫານແຂວງ ເຊກອງ ໄດ້ລົງນາມໃນບົດບັນທຶກຊ່ວຍຈໍາເພື່ອເປັນພື້ນຖານປະຕິບັດເນື້ອໃນດັ່ງກ່າວໃນໄລຍະຈະມາເຖິງເປັນຢ່າງດີ.

ແປໂດຍ: ຈາງຫງວຽນ