ເພື່ອຍາດໄດ້ໄຊຊະນະອັນສະຫງ່າງາມ, ຍາດໄດ້ເອກະລາດ, ເສລີພາບໃຫ້ປະເທດຊາດ, ທ້ອນໂຮມປະເທດຊາດເປັນເອກະພາບ, ທົ່ວປວງຊົນທັງຊາດໄດ້ມານະອົດທົນຕໍ່ສູ້, ຜ່ານຜ່າຄວາມຫຍຸ້ງຍາກ, ລຳບາກກາກກຳ, ເສຍສະຫຼະຊີວິດບໍ່ຈັກວ່າເທົ່າໃດໃນຕະຫຼອດ 30 ປີ, ຈາກໄຊຊະນະນີ້ໄປສູ່ໄຊຊະນະອື່ນ. ພິເສດ, ແຕ່ຕົ້ນເດືອນມິນາ 1975, ພາຍໃຕ້ການນຳພາຂອງພັກ, ກອງທັບ ແລະປະຊາຊົນຫວຽດນາມ ໄດ້ດຳເນີນບັ້ນບຸກໂຈມຕີ ແລະການລຸກຮື້ຂຶ້ນຄັ້ງໃຫຍ່ໃນທົ່ວພາກໃຕ້, ປະຕິບັດບັນດາບັ້ນຮົບສຳຄັນຢ່າງຕໍ່ເນື່ອງ, ມີລັກສະນະຕັດສິນ ຄື: ໄຕງວຽນ, ເຫວ້-ດ່ານັ້ງ ແລະບັ້ນຮົບ ໂຮ່ຈິມິນ ປະຫວັດສາດ. ໃນ 55 ວັນ ແລະຄືນບັ້ນບຸກໂຈມຕີ ແລະລຸກຮື້ຂຶ້ນ, ດ້ວຍຄວາມໄວ “ມື້ໜຶ່ງເທົ່າກັບຊາວປີ”, ດ້ວຍກຳລັງແຮງນັບທັງດ້ານການທະຫານ, ການເມືອງ, ກອງທັບ ແລະປະຊາຊົນຫວຽດນາມ ໄດ້ທັບມ້າງກົງຈັກການທະຫານໃຫຍ່ໂຕ ແລະທັນສະໄໝທັງໝົດຂອງອຳນາດການປົກຄອງຂອງພວກລູກແຫຼ້ງຕີນມື, ດ້ວຍທະຫານມີເຖິງ 1,1 ລ້ານຄົນ, ໃນນັ້ນມີ 4 ກອງພົນໃຫຍ່, 6 ກອງພົນທະຫານອາກາດ ແລະຫຼາຍສິບກອງພັນໃຫຍ່, ກອງພົນນ້ອຍທະຫານຊ່າງແສງ, ທະຫານເຮືອ ຂອງພວກທະຫານຫຸ່ນ...
    |
 |
|
ກົມການເມືອງ ແລະຄະນະພັກການທະຫານສູນກາງປະຊຸມເພື່ອຕັດສິນປົດປ່ອຍພາກໃຕ້, ທ້ອນໂຮມປະເທດຊາດເປັນເອກະພາບ. ພາບເອກະສານ. |
ໄຊຊະນະ 30 ເມສາ ແມ່ນໝາກຜົນຂອງການເສີມຂະຫຍາຍກຳລັງແຮງສັງລວມດ້ວຍກຸ່ມກ້ອນມະຫາສາມັກຄີ, ທົ່ວປວງຊົນສາມັກຄີກັບກຳລັງແຮງຍຸກສະໄໝ, ພາຍໃຕ້ການນຳພາຢ່າງຖືກຕ້ອງ, ສະຫຼາດສ່ອງໃສຂອງພັກ. ໄຊຊະນະຍັງເລີ່ມຕົ້ນມາຈາກມູນເຊື້ອຮັກຊາດ, ຈາກນ້ຳໃຈມຸ່ງມາດປາດຖະໜາຫາເອກະລາດ, ເສລີພາບ, ສັນຕິພາບ, ທ້ອນໂຮມປະເທດຊາດເປັນເອກະພາບຂອງປວງຊົນທັງຊາດຫວຽດນາມ ແລະການສະໜັບສະໜູນອັນລ້ຳຄ່າຂອງສະຫາຍ, ໝູ່ເພື່ອນ, ປະຊາຊົນກ້າວໜ້າໃນທົ່ວໂລກ, ດ້ວຍເຫດນັ້ນ, ໄຊຊະນະ 30 ເມສາ ແມ່ນໃຫຍ່ຫຼວງທີ່ສຸດ, ທັງມີຄວາມໝາຍປະຫວັດສາດ, ທັງມີລັກສະນະຍຸກສະໄໝ; ສະແດງໃຫ້ເຫັນຈັນຍາບັນ, ເຈດຈຳນົງຂອງ ຊາວຫວຽດນາມ, ຮູ້ຈັກສືບທອດ, ເສີມຂະຫຍາຍມູນເຊື້ອສ້າງສາ ແລະປົກປັກຮັກສາຂອງລຸ້ນພໍ່ລຸ້ນອ້າຍ, ບໍ່ຍອມຈຳນົນຕໍ່ໜ້າພວກສັດຕູຜູ້ຮຸກຮານ.
ໄຊຊະນະ 30 ເມສາ ໄດ້ສ້າງໃຫ້ຊາດຫວຽດນາມ ກ່ຽວກັບພື້ນຖານສັນຕິພາບ, ເອກະລາດ, ເອກະພາບຢ່າງໝັ້ນຄົງເຂັ້ມແຂງເພື່ອທົ່ວປະເທດກ້າວຂຶ້ນກໍ່ສ້າງລັດທິສັງຄົມນິຍົມ, ປະຕິບັດພາລະກິດສ້າງສາ ແລະປົກປັກຮັກສາປະເທດຊາດປະສົບຜົນສຳເລັດ. ຂອບຂະໜາດປະຫວັດສາດ ແລະບັນດາບົດຮຽນຈາກໄຊຊະນະ 30 ເມສາ ກຳລັງ ແລະໄດ້ແມ່ນກຳລັງໜູນອາລົມຈິດອັນໃຫຍ່ຫຼວງ, ລະດົມກຳລັງໃຈທົ່ວພັກ, ທົ່ວປວງຊົນ, ທົ່ວກອງທັບຫວຽດນາມ ສືບຕໍ່ໝູນໃຊ້ເຂົ້າໃນພາລະກິດສ້າງສາ ແລະປົກປັກຮັກສາປະເທດຊາດ.
|
|
 |
|
ກອງບັນຊາການບັ້ນຮົບ ໂຮ່ຈິມິນ ປະຊຸມຊີ້ນຳການສູ້ຮົບ. ພາບເອກະສານ. |
ໂດຍສືບທອດບັນດາຜົນງານອັນໃຫຍ່ຫຼວງຂອງການປະຕິວັດ, ຂອງໄຊຊະນະ 30 ເມສາ ເຊິ່ງບັນດາລຸ້ນພໍ່ລຸ້ນອ້າຍໄດ້ອອກກຳລັງເຫື່ອແຮງ, ສະຕິປັນຍາ, ເລື້ອດເນື້ອເຊື້ອໄຂ ຈຶ່ງຍາດມາໄດ້, ປັດຈຸບັນ, ໜ້າທ່ີຈຸດສຸມຂອງທົ່ວພັກ, ທົ່ວກອງທັບ, ທົ່ວປວງຊົນ ແມ່ນຄວນຕັ້ງໜ້າພັດທະນາເສດຖະກິດ-ສັງຄົມ, ປັບປຸງດ້ານປ້ອງກັນຊາດ, ປ້ອງກັນຄວາມສະຫງົບ, ຍົກສູງຖານະບົດບາດຂອງປະເທດຊາດ, ຍົກສູງຊີວິດການເປັນຢູ່ຂອງປະຊາຊົນ. ຈາກບົດຮຽນໄຊຊະນະ 30 ເມສາ ຊີ້ໃຫ້ເຫັນວ່າ, ເພື່ອປະຕິບັດໄດ້ໜ້າທີ່ດັ່ງກ່າວ, ພວກເຮົາຕ້ອງສືບຕໍ່ເສີມຂະຫຍາຍກຳລັງແຮງພາຍໃນແມ່ນມູນເຊື້ອຮັກຊາດ, ລັດທິວິລະຊົນປະຕິວັດ, ນ້ຳໃຈສາມັກຄີຂອງທົ່ວປວງຊົນທັງຊາດ. ເພີ່ມທະວີຄວາມສາມັກຄີເອກະພາບພາຍໃນພັກ, ໃນໝູ່ປະຊາຊົນບົນພື້ນຖານເປົ້າໝາຍ, ໜ້າທີ່ຂອງການປະຕິວັດ; ສຸມໃສ່ຈັດຕັ້ງການປະຕິບັດມະຕິກອງປະຊຸມໃຫຍ່ ຄັ້ງທີ XII ຂອງພັກ ແລະບັນດາມະຕິສູນກາງ 4 (ຊຸດທີ XI ແລະ XII), ຕິດພັນກັບການປະຕິບັດຄຳສັ່ງເລກທີ 05 ຂອງກົມການເມືອງກ່ຽວກັບການຮ່ຳຮຽນ ແລະປະຕິບັດຕາມແນວຄິດ, ຄຸນສົມບັດ, ແບບແຜນການດຳລົງຊີວິດຂອງປະທານ ໂຮ່ຈິມິນ ໄດ້ຢ່າງມີໄຊ. ຍົກສູງຄວາມສາມາດນຳພາ ແລະກຳລັງແຮງສູ້ຮົບຂອງພັກ; ປະສິດທິຜົນການຈັດຕັ້ງ, ຄຸ້ມຄອງ, ບໍລິຫານຂອງລັດ, ບົດບາດຄວາມຮັບຜິດຊອບຂອງພະນັກງານ, ສະມາຊິກພັກ ແລະປະຊາຊົນທຸກຊັ້ນວັນນະ. ເດັດດ່ຽວຕໍ່ສູ້ກັບປະກົດການອາດຍາສິດ, ສໍ້ລາດບັງຫຼວງ, ໄພຫຍໍ້ທໍ້, ໄພສັງຄົມ... ເປັນເຈົ້າການຕໍ່ສູ້ເຮັດໃຫ້ກົນອຸບາຍ, ເລ່ລ່ຽມ, ການເຄື່່ອນໄຫວ “ຜັນແປໂດຍສັນຕິ” ເສກສັນປັ້ນແຕ່ງ, ປະຕິເສດບັນດາຜົນງານຂອງການປະຕິວັດ, ມ້າງເພທຳລາຍພັກ, ລັດຫວຽດນາມ ຂອງພວກສັດຕູຖືກປະລາໄຊ, ປົກປັກຮັກສາຄວາມໝັ້ນຄົງ ແລະພັດທະນາປະເທດຊາດໃນສະພາບທີ່ເຊື່ອມໂຍງເຂົ້າກັບສາກົນນັບມື້ນັບເລິກເຊິ່ງກ້ວາງຂວາງ.
ກອງທັບປະຊາຊົນຫວຽດນາມ ກຳເນີດມາຈາກປະຊາຊົນ, ເພື່ອປະຊາຊົນຈຶ່ງມີການຕໍ່ສູ້, ໄດ້ປະຕິບັດສຳເລັດບົດບາດແມ່ນກຳລັງແກ່ນສານສ້າງໄຊຊະນະ 30 ເມສາ 1975. ປະຈຸບັນ, ກອງທັບປະຊາຊົນຫວຽດນາມ ສືບຕໍ່ໄດ້ຮັບການກໍໍ່ສ້າງຕາມທິດປະຕິວັດ, ເປັນກອງທັບຫຼວງ, ຍອດຢ້ຽມ, ທັນສະໄໝເທື່ອລະກ້າວ, ໃນນັ້ນ, ມີບາງກຳລັງກ້າວຂຶ້ນສູ່ຄວາມເປັນທັນສະໄໝ. ໂດຍເລີ່ມມາຈາກມູນເຊື້ອວິລະຊົນ, ວິລະກຳອັນສະຫງ່າຜ່າເຜີຍ, ພ້ອມທັງບັນດາບົດຮຽນອັນລ້ຳຄ່າທີ່ຖອດຖອນມາໄດ້ໃນວິວັດການກໍ່ສ້າງ, ຕໍ່ສູ້, ເຕີບໃຫຍ່ຂະຫຍາຍຕົວ, ເສີມຂະຫຍາຍຄວາມໝາຍ, ບົດຮຽນປະຫວັດສາດຂອງໄຊຊະນະ 30 ເມສາ, ກອງທັບປະຊາຊົນຫວຽດນາມ ສືບຕໍ່ຢັ້ງຢືນເຖິງຄຸນນະທາດ ແລະກຳລັງແຮງຂອງຕົນໃນໜ້າທີ່ກຽມພ້ອມສູ້ຮົບ ແລະສູ້ຮົບ, ພ້ອມກັບທົ່ວພັກ, ທົ່ວປວງຊົນປົກປັກຮັກສາປະເທດຊາດ ຫວຽດນາມ ສັງຄົມນິຍົມ, ດ້ວຍຄຸນນະທາດ, ມູນເຊື້ອທະຫານລຸງໂຮ່, ພະນັກງານ, ນັກຮົບທົ່ວກອງທັບຍາມໃດກໍ່ສາມັກຄີກັນ, ສະໜິດຕິດພັນກັບປະຊາຊົນ, ຊ່ວຍເຫຼືອປະຊາຊົນ ແລະອີງໃສ່ປະຊາຊົນເພື່ອສ້າງສາກອງທັບໃຫ້ນັບມື້ນັບເຂັ້ມແຂງ.
ແປໂດຍ: ຮຸຍດົງ