ບົດບາດຂອງທະຫານອາສາສະໝັກຫວຽດນາມ ໃນໄຊຊະນະວັນທີ 7 ມັງກອນ ແມ່ນຄວາມຈິງທີ່ບໍ່ອາດປະຕິເສດໄດ້
ກປ.ອອນໄລ - “ປະຊາຊົນກໍາປູເຈຍ ແລະໂລກລ້ວນແຕ່ຮັບຮູ້ວ່າຖ້າບໍ່ມີໄຊຊະນະໃນວັນທີ 7 ມັງກອນ 1979 ນັ້ນແມ່ນບໍ່ສາມາດຟື້ນຟູຊົນຊາດ ແລະປະເທດກໍາປູເຈຍ ໄດ້.
ແລະຖ້າບໍ່ມີການຊ່ວຍເຫຼືອຂອງເພື່ອນມິດອ້າຍນ້ອງ, ເພື່ອນຮ່ວມກອງຫວຽດນາມ ນັ້ນ ກໍາປູເຈຍ ກໍ່ບໍ່ສາມາດຍາດໄດ້ໄຊຊະນະສຸດທ້າຍ ແລະບັນລຸໄດ້ບັນດາໝາກຜົນ, ຜົນງານຄືໃນປັດຈຸບັນ. ນີ້ແມ່ນຄວາມຈິງທີ່ບໍ່ອາດປະຕິເສດໄດ້”. ນີ້ແມ່ນຄໍາຢືນຢັນຂອງນັກຂ່າວ Keo Chandara, ຮອງຜູ້ອໍານວຍການສໍານັກຂ່າວສານກໍາປູເຈຍ (AKP) ໃນການໃຫ້ສໍາພາດຕໍ່ນັກຂ່າວຂອງສໍານັກຂ່າວສານຫວຽດນາມ ປະຈໍາ ພະນົມເປັນ ແລະກໍ່ແມ່ນຂໍ້ສັງເກດລວມຂອງນັກຊ່ຽວຊານ, ນັກຂ່າວຫຼາຍທ່ານເມື່ອແລກປ່ຽນກ່ຽວກັບຄວາມໝາຍຂອງເຫດການ 40 ປີແຫ່ງວັນປົດປ່ອຍ ກໍາປູເຈຍ ອອກຈາກລະບອບຂະແມແດງ ແລະບົດບາດຂອງທະຫານອາສາສະໝັກຫວຽດນາມ ໃນເຫດການນີ້.
|
|
ນັກຂ່າວ Keo Chandara, ຮອງຜູ້ອໍານວຍການສໍານັກຂ່າວສານກໍາປູເຈຍ (AKP) ໃຫ້ສໍາພາດຕໍ່ນັກຂ່າວ. ພາບ: ສໍານັກຂ່າວສານຫວຽດນາມ. |
ເມື່ອຕີລາຄາກ່ຽວກັບບົດບາດຂອງທະຫານອາສາສະໝັກຫວຽດນາມ ສໍາລັບໄຊຊະນະໃນວັນທີ 7 ມັງກອນ 1979, ນັກຂ່າວ Teav Sarak Mony ໄດ້ຄັດສະເໜີຄໍາເວົ້າຂອງທ່ານ ສົມເດັດ ເຕໂຈ ຮຸນແຊນ ນາຍົກລັດຖະມົນຕີກໍາປູເຈຍ ໃນການຢ້ຽມຢາມ ຫວຽດນາມ ຢ່າງເປັນທາງການໃນມໍ່ໆມານີ້, ຢືນຢັນວ່າບົດບາດການຕັດສິນໃຈຂອງ ຫວຽດນາມ ໃນການຊ່ວຍເຫຼືອ ກໍາປູເຈຍ ແມ່ນຄວາມຈິງທີ່ບໍ່ອາດປະຕິເສດໄດ້. ຖ້າບໍ່ມີໄຊຊະນະໃນວັນທີ 7 ມັງກອນ 1979, ຖ້າບໍ່ມີການຊ່ວຍເຫຼືອຈາກທະຫານອາສາສະໝັກຫວຽດນາມ ກໍ່ຄືການຊ່ວຍເຫຼືອ, ສະໜັບສະໜູນຈາກພັກ, ລັດ ແລະປະຊາຊົນຫວຽດນາມ ໃນຕະຫຼອດ 10 ປີ (1979-1989) ນັ້ນປະຊາຊົນ ແລະປະເທດກໍາປູເຈຍ ກໍ່ບໍ່ສາມາດຟື້ນຟູ ແລະພັດທະນາຄືໃນປັດຈຸບັນ, ພິເສດແມ່ນພາຍຫຼັງວັນປົດປ່ອຍ, ປະເທດກໍາປູເຈຍ ຕ້ອງປະເຊີນໜ້າກັບ 2 ບັນຫາໃຫຍ່ແມ່ນສ້າງສາປະເທດຄືນໃໝ່ໄປພ້ອມກັບການສະກັດກັ້ນການກັບຄືນມາຂອງລະບອບດັບສູນເຊື້ອຊາດຂະແມແດງ.
|
|
ນັກຂ່າວຊາວອົດສະຕາລີ Peter Starr, ທີ່ປຶກສາດ້ານສື່ມວນຊົນຫ້ອງວ່າການສະພາແຫ່ງຊາດກໍາປູເຈຍ ໃຫ້ສໍາພາດຕໍ່ນັກຂ່າວ. ພາບ: ສໍານັກຂ່າວສານຫວຽດນາມ. |
ເມື່ອຕອບສຳພາດກັບນັກຂ່າວສໍານັກຂ່າວສານຫວຽດນາມ, ນັກຂ່າວຊາວອົດສະຕາລີ Peter Starr, ທີ່ປຶກສາດ້ານສື່ມວນຊົນຫ້ອງວ່າການສະພາແຫ່ງຊາດກໍາປູເຈຍ, ຖືວ່າເຫດການວັນທີ 7 ມັງກອນ 1979 ອາດຈະໄດ້ຮັບຖືວ່າເປັນວັນສໍາຄັນທີ່ສຸດສໍາລັບປະຊາຊົນກໍາປູເຈຍ ໝົດທຸກຄົນ, ເປັນຂີດໝາຍແຫ່ງຄວາມເສລີ, ເປັນຂີດໝາຍແຫ່ງການຫຼຸດພົ້ນອອກຈາກລະບອບດັບສູນເຊື້ອຊາດຂະແມແດງ. ຕາມທ່ານແລ້ວ, ຖ້າບໍ່ມີການຊ່ວຍເຫຼືອຂອງທະຫານອາສາສະໝັກຫວຽດນາມ, ອາດຈະມີປະຊາຊົນກໍາປູເຈຍ ນັບຫຼາຍໝື່ນຄົນ, ຊ້ຳບໍ່ໜຳແມ່ນຫຼາຍຮ້ອຍຫຼາຍພັນຄົນຖືກເຂັ່ນຂ້າພາຍໃຕ້ລະບອບຂະແມແດງ.
ໂດຍ: ໄຊຊະນະ