ຫວຽດນາມ ມອບເຂົ້າສານ 5.000 ໂຕນໃຫ້ ກູບາ
ກປ.ອອນໄລ - ວັນທີ 19 ມິຖຸນາ, ທີ່ສໍານັກງານກະຊວງການຄ້າ ແລະການລົງທຶນຕ່າງປະເທດ ກູບາ (Mincex) ໄດ້ດໍາເນີນພິທີມອບຮັບຂອງຂວັນເຊິ່ງແມ່ນເຂົ້າສານ 5.000 ໂຕນ ຈາກພັກ, ລັດ ແລະປະຊາຊົນ ຫວຽດນາມ ໃຫ້ແກ່ປະຊາຊົນ ກູບາ.
ຂອງຂວັນນີ້ໄດ້ຮັບການປະກາດໃນການຢ້ຽມຢາມ ກູບາ ຂອງທ່ານປະທານປະເທດຫວຽດນາມ ເຈິ່ນດ້າຍກວາງ ໃນເດືອນພະຈິກ 2016. ແລກປ່ຽນກ່ອນພິທີເຊັນມອບຮັບ, ທ່ານ ເລວັນເທີ່ຍ ຮອງຫົວໜ້າກົມໃຫຍ່ຄັງແຮແຫ່ງລັດ ຫວຽດນາມ, ໄດ້ທົບຫວນຄືນບັນດາການຊ່ວຍເຫຼືອທາງດ້ານວັດຖຸ ແລະຈິດໃຈທີ່ລໍ້າຄ່າເຊິ່ງປະຊາຊົນ ກູບາ ອ້າຍນ້ອງໄດ້ສະຫງວນໃຫ້ແກ່ປະຊາຊົນ ຫວຽດນາມ ໃນການຕໍ່ຕ້ານຈັກກະພັດ ອາເມລິກາ, ທ້ອນໂຮມປະເທດຊາດເປັນເອກະພາບ; ພ້ອມກັນນັ້ນກໍ່ເນັ້ນໜັກເຖິງນໍ້າໃຈສັດຊື່ບໍລິສຸດ ແລະການສະໜັບສະໜູນອັນບໍລິສຸດຜຸດຜ່ອງຂອງພັກ, ລັດ, ປະຊາຊົນ ຫວຽດນາມ ຕໍ່ພາລະກິດປະຕິວັດຂອງປະຊາຊົນ ກູບາ.
ທ່ານ Raul Castro ປະທານປະເທດ ກູບາ ຕ້ອນຮັບທ່ານ ເຈິ່ນດ້າຍກວາງ ປະທານປະເທດ ຫວຽດນາມ ໃນວັນທີ 17 ພະຈິກ 2016. ພາບ: Reuters
ທ່ານ Alejandro Mustelier Zamora ຜູ້ອໍານວຍການໃຫຍ່ບໍລິສັດໃຫຍ່ຂາເຂົ້າຂາອອກສະບຽງອາຫານ ກູບາ (Alimport) ໄດ້ສະແດງຄວາມຂອບອົກຂອບໃຈຕໍ່ຂອງຂວັນທີ່ແທດຈິງ ແລະຕີລາຄາວ່ານີ້ແມ່ນສັນຍາລັກແຫ່ງຄວາມລະອຽດກວ່າຂອງນໍ້າໃຈມິດຕະພາບສະໜິດຕິດພັນຢ່າງໜຽວແໜ້ນລະຫວ່າງສອງພັກ, ສອງລັດ ແລະສອງປະເທດ ຫວຽດນາມ-ກູບາ. ທ່ານ Mustelier ກໍ່ເນັ້ນໜັກເຖິງຄວາມໝາຍຂອງຂອງຂວັນສຳລັບປະຊາຊົນບັນດາແຂວງພາກຕາເວັນອອກ ກູບາ ເຊິ່ງແມ່ນບ່ອນທີ່ຖືກຜົນກະທົບຈາກລົມພະຍຸໃຫຍ່ໃນທ້າຍປີກາຍ. ກ່ອນນັ້ນ, ກຳປັ່ນຂົນສົ່ງເຂົ້າສານດັ່ງກ່າວໄດ້ເຂົ້າທຽບທ່າກໍາປັ່ນນະຄອນ Santiago de Cuba, ທາງທິດຕາເວັນອອກ ກູບາ ແລະໄດ້ມອບສົ່ງໃຫ້ແກ່ຝ່າຍເພື່ອນມິດ.
ແປໂດຍ: ຈາງຫງວຽນ