ນັກຂ່າວ: ຂໍຮຽນທ່ານເລຂາທິການໃຫຍ່, ປະທານປະເທດຫວຽດນາມ, ປີ 2018 ໄດ້ຜ່ານໄປແລ້ວ-ເຊິ່ງແມ່ນປີພິສູດໃຫ້ເຫັນຄວາມມານະພະຍາຍາມຮ່ວມແຮງຮ່ວມໃຈ, ເປັນຈິດໜຶ່ງໃຈດຽວຂອງທົ່ວພັກ, ທົ່ວປວງຊົນ, ທົ່ວກອງທັບຫວຽດນາມ ສືບຕໍ່ກ້າວເດີນຢ່າງໝັ້ນແກ່ນບົນເສັ້ນທາງ ເຊິ່ງພັກ, ລຸງໂຮ່ ແລະປະຊາຊົນຫວຽດນາມໄດ້ຄັດເລືອກ!

ທ່ານ ຫງວຽນຟຸຈ້ອງ ເລຂາທິການໃຫຍ່, ປະທານປະເທດຫວຽດນາມ: ສິ້ນສຸດປີ 2018 - ເຊິ່ງແມ່ນປີທີ່ເຕັມໄປດ້ວຍຄວາມຫຍຸ້ງຍາກ, ສິ່ງທ້າທາຍຫຼາຍຢ່າງ, ແຕ່ປະຊາຊົນຫວຽດນາມ ໄດ້ບືນຕົວຂຶ້ນ, ສ້າງບັນດາຜົນງານອັນໃຫຍ່ຫຼວງໃນຫຼາຍຂົງເຂດ, ສ້າງສາ, ພັດທະນາປະເທດຊາດ ແລະຮ່ວມມືພັດທະນາ. ນັ້ນແມ່ນຜົນງານສ້າງເປັນປະເທດຫວຽດນາມ ທັງໝັ້ນຄົງເຂັ້ມແຂງ, ທັງຂະຫຍັນຂັນເຄື່ອນກະໂດດຂັ້ນພາຍຫຼັງ 3 ປີແຫ່ງການປະຕິບັດມະຕິກອງປະຊຸມໃຫຍ່ຄັ້ງທີ XII ຂອງພັກ, ດ້ວຍບັນດາລະດັບເຕີບໂຕເສດຖະກິດສັງລວມ GDP ປີ 2018 ບັນລຸ 7,08% ສູງທີ່ສຸດໃນ 11 ປີຜ່ານມາ.

leftcenterrightdel
ທ່ານ ຫງວຽນຟຸຈ້ອງ ເລຂາທິການໃຫຍ່, ປະທານປະເທດຫວຽດນາມ. ພາບ: qdnd.vn.

ນັກຂ່າວ: ຂໍຮຽນທ່ານເລຂາທິການໃຫຍ່, ປະທານປະເທດຫວຽດນາມ ຂໍທ່ານອະທິບາຍຢ່າງຈະແຈ້ງກວ່າກ່ຽວກັບວຽກງານທີ່ພວກເຮົາໄດ້ປະຕິບັດຕາມຄຳພິໄນກຳຂອງປະທານ ໂຮ່ຈິມິນ ໃນຂົງເຂດກໍ່ສ້າງ, ປັບປຸງພັກໄລຍະຜ່ານມາ?

ທ່ານ ຫງວຽນຟຸຈ້ອງ ເລຂາທິການໃຫຍ່, ປະທານປະເທດຫວຽດນາມ: ລະດູບານໃໝ່ປີນີ້ແມ່ນລະດູບານໃໝ່ທີ 50, ທີ່ລຸງໂຮ່ ຜູ້ແສນເຄົາລົບຮັກເຖິງແກ່ມໍລະນະກໍາ! ລຸງໂຮ່ ເຖິງມໍລະນະກໍາບໍ່ພຽງເປັນຄວາມໂສກເສົ້າເສຍດາຍໃຫ້ແກ່ທົ່ວພັກ, ທົ່ວປວງຊົນ ແລະເພື່ອນມິດສາກົນເທົ່ານັ້ນ, ຫາກເພິ່ນໄດ້ສືບທອດໃຫ້ພວກເຮົາພາລະກິດທີ່ຍິ່ງໃຫຍ່, ຊັບສົມບັດດ້ານຈິດໃຈທີ່ລໍ້າຄ່າອີກດ້ວຍ, ໃນນັ້ນມີຄຳພິໄນກຳປະຫວັດສາດອັນປະເສີດທີ່ສຸດ. ບັນດາບົດຮຽນເລືອດເນື້ອເຊິ່ງໄດ້ຮັບການຖອດຖອນໃນຕະຫຼອດຊີວິດແຫ່ງການເຄື່ອນໄຫວປະຕິວັດຢ່າງອຸດົມສົມບູນ, ເຕັມໄປດ້ວຍພຶດຕິກຳຕົວຈິງຂອງເພິ່ນ.

ບັນຫາທໍາອິດ, ກໍ່ແມ່ນເນື້ອໃນສໍາຄັນພິເສດເຊິ່ງລຸງໂຮ່ ເວົ້າເຖິງພັກ ແລະຕັກເຕືອນວ່າ: “ບັນດາສະຫາຍແຕ່ສູນກາງຕະຫຼອດຮອດບັນດາໜ່ວຍພັກ ຕ້ອງຮັກສາຄວາມສາມັກຄີເຫັນດີເປັນເອກະສັນຂອງພັກຄືດັ່ງຮັກສາແກ້ວຕາຂອງຕົນ”; “ຕ້ອງຮັກສາພັກກອມມູນິດຫວຽດນາມ ໃຫ້ສະອາດປອດໃສ, ສົມເປັນຜູ້ນໍາພາ, ເປັນຄົນຮັບໃຊ້ທີ່ສັດຊື່ບໍລິສຸດຂອງປະຊາຊົນ”.

ໃນຊຸມປີຜ່ານມາ, ເປັນຕົ້ນແມ່ນປີ 2018, ພວກເຮົາສືບຕໍ່ປະຕິບັດຫຼາຍເນື້ອໃນໃນຄຳພິໄນກຳຂອງປະທານ ໂຮ່ຈິມິນ ເປັນຢ່າງດີ. ພາຍໃນພັກຍາມໃດກໍ່ມີຄວາມສາມັກຄີ, ເຫັນດີເປັນເອກະພາບສູງ, ບືນຕົວຂື້ນ ແລະຜ່ານຜ່າທຸກໆຄວາມຫຍຸ້ງຍາກ, ສິ່ງທ້າທາຍ. ຍ້ອນຕັດສິນໃຈກໍ່ສ້າງ “ພັກກອມມູນິດຫວຽດນາມ ໃຫ້ມີຄວາມສະອາດປອດໃສ”, ພັກກອມມູນິດຫວຽດນາມ ໄດ້ມີບັນດານະໂຍບາຍຂ້ຽວຂາດ, ຕໍ່ສູ້ຢ່າງບໍ່ຜ່ອນສັ້ນຜ່ອນຍາວຕໍ່ “ສັດຕູພາຍໃນ”; ສ້າງຂະບວນການ, ບັນຍາກາດໃໝ່ໃນການຕໍ່ສູ້, ຕ້ານໄພສໍ້ລາດບັງຫຼວງ, ອາດຍາສິດ, ຟຸມເຟືອຍ, ໄພຫຍໍ້ທໍ້. ອີງໃສ່ຄວາມສາມັກຄີເປັນຢ່າງດີ, ຄະນະບໍລິຫານງານສູນກາງ, ທັງລະບົບການເມືອງ, ພ້ອມກັບພະນັກງານ, ສະມາຊິກພັກທັງໝົດໄດ້ເຫັນດີເປັນເອກະພາບກະທໍາ, ສົມທົບກັນຢ່າງເຂົ້າແກັບເຂົ້າເກັຍ, ນໍາພາປະເທດຊາດປະຕິບັດສໍາເລັດຫຼາຍເປົ້າໝາຍພັດທະນາເສດຖະກິດ-ສັງຄົມເປັນຢ່າງດີ, ຮັກສາຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍ, ຄວາມປອດໄພທາງສັງຄົມໄວ້ໃຫ້ໝັ້ນຄົງ, ປົກປັກຮັກສາເອກະພາບ ແລະຜືນແຜ່ນດິນອັນຄົບຖ້ວນຂອງປະເທດຊາດ. ຍ້ອນມີຄວາມສາມັກຄີເປັນຢ່າງດີ, ສູນກາງພັກ, ສະພາແຫ່ງຊາດ, ລັດຖະບານ... ຍາມໃດກໍ່ເຫັນດີເປັນເອກະພາບຢ່າງສູງ, ປະກາດໃຊ້ບັນດາແຜນນະໂຍບາຍ, ນະໂຍບາຍຢ່າງຖືກຕ້ອງນໍາພາພາລະກິດການປະຕິວັດ, ຍາດໄດ້ໄຊຊະນະອັນໃຫຍ່ຫຼວງຫຼາຍຢ່າງໃນເງື່ອນໄຂໃໝ່.

ນັກຂ່າວ: ຂໍຮຽນທ່ານເລຂາທິການໃຫຍ່, ປະທານປະເທດຫວຽດນາມ ໃນເງື່ອນໄຂທ່ວງທ່າປະເທດຊາດ, ຈິດໃຈຂອງປະຊາຊົນໃນປະຈຸບັນ, ພວກເຮົາຈະເຮັດຫຍັງເພື່ອສືບຕໍ່ປະຕິບັດຄວາມສາມັກຄີເປັນຢ່າງດີ ແລະ ກໍ່ສ້າງພັກໃຫ້ນັບມື້ນັບສະອາດປອດໃສ, ໝັ້ນຄົງເຂັ້ມແຂງ?

ທ່ານ ຫງວຽນຟຸຈ້ອງ ເລຂາທິການໃຫຍ່, ປະທານປະເທດຫວຽດນາມ: ປະທານ ໂຮ່ຈິມິນ ເຄີຍຢືນຢັນວ່າ: “ໃນທ້ອງຟ້າບໍ່ມີຫຍັງປະເສີດກວ່າປະຊາຊົນ. ໃນໂລກບໍ່ມີຫຍັງແຮງກວ່າກໍາລັງສາມັກຄີຂອງປະຊາຊົນ”. ປີຜ່ານມາ, ປະເທດຫວຽດນາມ ບັນລຸໄດ້ບັນດາຜົນງານປະເສີດທີ່ສຸດ, ສ້າງພື້ນຖານສໍາຄັນໃຫ້ແກ່ການພັດທະນາແບບຍືນຍົງຂອງພາລະກິດການປະຕິວັດ. ທຸກສິ່ງທຸກຢ່າງລ້ວນແຕ່ອີງໃສ່ກໍາລັງແຮງແຫ່ງຄວາມສາມັກຄີຂອງປະຊາຊົນພາຍໃຕ້ການນໍາພາຂອງພັກ.

ກ້າວເຂົ້າປີໃໝ່, ຫວັງວ່າແຕ່ລະຄົນຈະມີສະຕິຄວາມຮັບຮູ້ຢ່າງເລິກເຊິ່ງ ແລະຄົບຖ້ວນກວ່າອີກກ່ຽວກັບທີ່ຕັ້ງ, ຄວາມສໍາຄັນຂອງຄວາມສາມັກຄີ: ຄວາມສາມັກຄີລະຫວ່່າງບັນດາເຜົ່າ, ລະຫວ່າງເຂດພາກ, ລະຫວ່່າງທຸກຊັ້ນວັນນະ; ຄວາມສາມັກຄີລະຫວ່າງປະຊາຊົນກັບພັກ, ລະຫວ່າງມະຫາຊົນ ແລະພະນັກງານ, ສະມາຊິກພັກ... ພ້ອມກັນນັ້ນ, ປະຊາຊົນແຕ່ລະຄົນຕ້ອງເຫັນແຈ້ງຄວາມຮັບຜິດຊອບຂອງພົນລະເມືອງ, ພ້ອມກັບທົ່ວພັກ ແລະລະບົບການເມືອງ, ສືບຕໍ່ປະກອບສ່ວນເຂົ້າໃນພາລະກິດກໍ່ສ້າງພັກ, ເຮັດໃຫ້ພັກນັບມື້ນັບສົມເປັນຜູ້ນໍາພາ, ເປັນຄົນຮັບໃຊ້ທີ່ສັດຊື່ບໍລິສຸດຂອງປະຊາຊົນ.

leftcenterrightdel
ທ່ານ ຫງວຽນຟຸຈ້ອງ ເລຂາທິການໃຫຍ່, ປະທານປະເທດຫວຽດນາມ ກວດແຖວກຽດຕິຍົດກອງທັບປະຊາຊົນຫວຽດນາມ. ພາບ: ຈ້ອງຫາຍ.

ນັກຂ່າວ: ຂໍຮຽນທ່ານເລຂາທິການໃຫຍ່, ປະທານປະເທດຫວຽດນາມ ເນື່ອງໃນໂອກາດບຸນປີໃໝ່, ທ່ານຢາກສົ່ງສານໃດແດ່ເຖິງພະນັກງານ, ນັກຮົບກໍາລັງປະກອບອາວຸດໃນທົ່ວປະເທດ?

ທ່ານ ຫງວຽນຟຸຈ້ອງ ເລຂາທິການໃຫຍ່, ປະທານປະເທດຫວຽດນາມ: ໃນນາມພັກ, ລັດ, ຄະນະພັກການທະຫານສູນກາງ, ຂ້າພະເຈົ້າຊົມເຊີຍ ແລະຍ້ອງຍໍພະນັກງານ, ນັກຮົບໃນກອງທັບໄດ້ສາມັກຄີ, ປະຕິບັດໜ້າທີ່ ແລະກໍ່ສ້າງອົງຄະນະພັກກອງທັບຢ່າງສະອາດປອດໃສ, ໝັ້ນຄົງເຂັ້ມແຂງໃນຕະຫຼອດວິວັດການກໍ່ສ້າງ, ຕໍ່ສູ້ ແລະເຕີບໃຫຍ່.

ກ້າວເຂົ້າປີໃໝ່, ຫວັງວ່າພະນັກງານ, ນັກຮົບກອງທັບແຕ່ລະຄົນຈະສືບຕໍ່ຝັງເລິກສັດຈະທຳກ່ຽວກັບກົກເຄົ້າຂອງກອງທັບປະຕິວັດທີ່ເປັນທໍາ: “ກອງທັບແມ່ນມາຈາກປະຊາຊົນ, ຕໍ່ສູ້ເພື່ອປະຊາຊົນ,” ໃນບໍ່ວ່າສະຖານະການໃດ, ແຕ່ລະໝູ່ຄະນະ, ແຕ່ລະບຸກຄົນຕ້ອງຍົກສູງຈິດໃຈຮັບຜິດຊອບ, ຮັກສາຄຸນນະທາດ, ຮູບພາບທະຫານລຸງໂຮ່ ໃຫ້ສວຍງາມໃນດວງໃຈຂອງປະຊາຊົນຕະຫຼອດໄປ.

ຂ້າພະເຈົ້າຂໍສົ່ງຄຳຢື້ຢາມຖາມຂ່າວ, ພອນໄຊອັນປະເສີດທີ່ສຸດເຖິງພະນັກງານ, ນັກຮົບກໍາລັງປະກອບອາວຸດ. ຂ້າພະເຈົ້າເຊື່ອໝັ້ນວ່າ, ພະນັກງານ, ນັກຮົບກອງທັບປະຊາຊົນຫວຽດນາມ ກ້າວເຂົ້າປີໃໝ່ປີກຸນ 2019 ສືບຕໍ່ສ້າງວິລະກໍາ, ຜົນງານໃໝ່ຫຼາຍຢ່າງ ເພື່ອປະກອບສ່ວນເຂົ້າໃນພາລະກິດສ້າງສາ ແລະປົກປັກຮັກສາປະເທດຊາດຫວຽດນາມ ສັງຄົມນິຍົມທີ່ແສນຮັກຂອງພວກເຮົາ!

ນັກຂ່າວ: ຂໍຂອບໃຈທ່ານເລຂາທິການໃຫຍ່, ປະທານປະເທດ!

ໂດຍ: ບົວພອນ