ຫວນຄືນບັນດາຂີດໝາຍອັນຮຸ່ງເຮືອງເຫຼືອງເຫຼື້ອມ, ຍິ່ງເອກອ້າງທະນົງໃຈກວ່າກ່ຽວກັບປະຫວັດສາດ, ມູນເຊື້ອອັນສະຫງ່າລາສີຂອງປະເທດຊາດ, ຄວາມອົງອາດກ້າແກ່ນ, ບໍ່ຍອມຈຳນົນ ແລະຈິດໃຈສາມັກຄີ, ກໍາລັງແຮງອັນໃຫຍ່ຫຼວງຂອງທະຫານ ແລະປະຊາຊົນຫວຽດນາມ, ພິເສດຍິ່ງເຫັນແຈ້ງວິລະກໍາ, ຖານະບົດບາດຂອງພັກກອມມູນິດຫວຽດນາມ.

ພາຍໃຕ້ການນໍາພາຂອງພັກ, ດ້ວຍກໍາລັງແຮງຂອງກຸ່ມກ້ອມມະຫາສາມັກຄີທົ່ວປວງຊົນທັງຊາດ, ປະຊາຊົນຫວຽດນາມ ໄດ້ສ້າງເປັນການປະຕິວັດເດືອນສິງຫາ ປີ 1945 ທີ່ຍິ່ງໃຫຍ່-ການປະຕິວັດຫົວເມືອງຂຶ້ນສໍາເລັດຜົນທຳອິດໃນໂລກດ້ວຍການກໍາເນີດຂອງລັດກຳມະກອນ ແລະຊາວນາທໍາອິດຢູ່ອາຊີຕາເວັນອອກສ່ຽງໃຕ້, ນໍາປະເທດຊາດຫວຽດນາມ ກ້າວເຂົ້າສັງກາດເອກະລາດ, ເສລີພາບ ແລະລັດທິສັງຄົມນິຍົມ. ນັ້ນແມ່ນຜົນງານມະຫັດສະຈັນຂອງປະເທດຊາດ, ແມ່ນຖານະບົດບາດຂອງພັກກອມມູນິດຫວຽດນາມ.

leftcenterrightdel
ພາບປະກອບ: ຮວ່າເລ.

ໄຊຊະນະບໍ່ດົນປານໃດ, ສົງຄາມກໍ່ກັບຕ່າວຄືນມາ.  ບໍ່ຍອມຈໍານົນຕໍ່ການຮຸກຮານຂອງລັດທິຈັກກະພັດ, ພັກກອມມູນິດຫວຽດນາມ ດ້ວຍພາລະກໍາປະຫວັດສາດຂອງຕົນສືບຕໍ່ນໍາພາທະຫານ ແລະປະຊາຊົນທົ່ວປະເທດຕໍ່ສູ້ຢ່າງພິລະອາດຫານໃນຕະຫຼອດ 30 ປີ, ຜາບແພ້ການຮຸກຮານດ້ວຍກຳລັງອາວຸດຢ່າງໂຫດຮ້າຍສາມານ, ປົດປ່ອຍຊາດ, ທ້ອນໂຮມປະເທດຊາດເປັນເອກະພາບ, ນໍາປະເທດກ້າວຂຶ້ນກໍ່ສ້າງລັດທິສັງຄົມນິຍົມ. ຜົນສໍາເລັດຂອງການປະຕິວັດຫວຽດນາມ ພາຍໃຕ້ການນຳພາຂອງພັກກອມມູນິດຫວຽດນາມ ໄດ້ປະກອບສ່ວນສໍາຄັນເຂົ້າໃນພາລະກິດປົດປ່ອຍບັນດາປະເທດຖືກກົດຂີ່ຂູດຮີດໃນໂລກ; ແມ່ນກຳລັງໜູນລະດົມມະໂນທຳ ແລະກໍາລັງຮັກຫອມສັນຕິພາບລຸກຮືຂຶ້ນທວງເອົາ “ສິດໄດ້ມີຊີວິດ, ສິດເສລີພາບ ແລະສິດໄດ້ມີຄວາມສຸກ”. ນັ້ນແມ່ນຜົນງານມະຫັດສະຈັນໃໝ່ຕື່ມອີກບໍ່ພຽງແຕ່ຂອງປະເທດຊາດຫວຽດນາມ ເທົ່ານັ້ນ ຫາກຍັງແມ່ນບາດກ້າວເຕີບໃຫຍ່ເຂັ້ມແຂງກະໂດດຂັ້ນ, ຢັ້ງຢືນຖານະບົດບາດຂອງພັກກອມມູນິດຫວຽດນາມ ອີກດ້ວຍ.

ປະເທດຊາດໄດ້ຮັບການປົດປ່ອຍແລ້ວ, ແຕ່ຍັງປະສົບກັບຄວາມຫຍຸ້ງຍາກ, ຂາດເຂີນຫຼາຍຢ່າງ. ເພື່ອບໍ່ໃຫ້ປະເທດຕົກເຂົ້າສູ່ສະພາບອຶດຫິວ, ຫຼ້າຫຼັງ, ພັກກອມມູນິດຫວຽດນາມ ໄດ້ນຳໜ້າໃນການນໍາພາປະຊາຊົນທົ່ວປະເທດກ້າວຂຶ້ນກໍ່ສ້າງລັດທິສັງຄົມນິຍົມເທື່ອລະກ້າວ. ພິເສດ, ດ້ວຍຈິນຕະນາການປ່ຽນແປງໃໝ່, ທັງຢຶດໝັ້ນຕໍ່ເປົ້າໝາຍອຸດົມຄະຕິເອກະລາດແຫ່ງຊາດຕິດພັນກັບລັດທິສັງຄົມນິຍົມ, ທັງຍາດແຍ່ງໝູນໃຊ້ການພັດທະນາຢ່າງແຮງຂອງທ່າອ່ຽງຍຸກສະໄໝ, ພາຍຫຼັງກວ່າ 30 ປີແຫ່ງການປະຕິບັດແນວທາງປ່ຽນແປງໃໝ່, ພາຍໃຕ້ການນໍາພາຂອງພັກ, ປະຊາຊົນຫວຽດນາມ ໄດ້ສ້າງເປັນຜົນງານມະຫັດສະຈັນທີ່ມີຄວາມໝາຍປະຫວັດສາດໃນການສ້າງສາ ແລະພັດທະນາປະເທດຊາດ; ພ້ອມທັງສະແດງໃຫ້ເຫັນຄວາມຮັບຜິດຊອບຂອງຕົນໃນຫຼາຍບັນຫາສາກົນ ແລະພາກພື້ນ. ອິດທິພົນຊື່ສຽງ, ຖານະບົດບາດຂອງຫວຽດນາມ, ຂອງພັກກອມມູນິດຫວຽດນາມ ນັບມື້ນັບໄດ້ຮັບການຢັ້ງຢືນໃນເວທີສາກົນ.

ຜົນງານຂອງກວ່າ 30 ປີແຫ່ງການປະຕິບັດແນວທາງປ່ຽນແປງໃໝ່ໂດຍພັກກອມມູນິດຫວຽດນາມ ລິເລີ່ມ ແລະນໍາພາໄດ້ນໍາປະເທດຫວຽດນາມ ຈາກປະເທດດ້ອຍພັດທະນາ ກາຍເປັນປະເທດພັດທະນາປານກາງ; ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການປັບປຸງ ແລະຍົກສູງ. ດ້ວຍທັດສະນະສົມທົບກັນຢ່າງແໜ້ນແຟ້ນລະຫວ່າງເສດຖະກິດກັບການຮັບປະກັນຄວາມສະເໝີພາບໃນສັງຄົມ, ພັກກອມມູນິດຫວຽດນາມ ໄດ້ນໍາພາປະເທດຊາດສໍາເລັດເປົ້າໝາຍພັດທະນາສະຫັດສະວັດ, ໄດ້ຮັບການຮັບຮູ້ຈາກໂລກ.

ປະເທດຊາດພັດທະນາ, ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການຍົກສູງຂຶ້ນ, ຊີວິດສັງຄົມໄດ້ຮັບປະກັນ, ອະທິປະໄຕແຫ່ງຊາດໄດ້ຮັບການຮັກສາໄວ້ຢ່າງໝັ້ນຄົງ, ຖານະບົດບາດຂອງຫວຽດນາມ ນັບມື້ນັບໄດ້ຮັບການຢັ້ງຢືນໃນເວທີສາກົນ... ສິ່ງທັງໝົດເຫຼົ່ານັ້ນຈະບໍ່ມີໄດ້ຖ້າຫາກບໍ່ມີການນໍາພາຂອງພັກກອມມູນິດຫວຽດນາມ. ນັ້ນແມ່ນຖານະບົດບາດຂອງພັກກອມມູນິດຫວຽດນາມ.

ໂດຍ: ບົວພອນ