ຕອນບ່າຍວັນທີ 2 ພະຈິກ, ຢູ່ສໍານັກງານປະທານປະເທດ, ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ໄດ້ເປັນປະທານພິທີຕ້ອນຮັບທ່ານ Édouard Philippe ນາຍົກລັດຖະມົນຕີ ຝະລັ່ງ.

ພາຍຫຼັງພິທີຕ້ອນຮັບ, ການນໍາສອງທ່ານໄດ້ດໍາເນີນການພົບປະເຈລະຈາ. ທີ່ການພົບປະເຈລະຈາ, ສອງຝ່າຍເຫັນດີເປັນເອກະພາບເພີ່ມທະວີການແລກປ່ຽນພົບປະທຸກຂັ້ນ, ພ້ອມທັງເສີມຂະຫຍາຍບົດບາດຂອງບັນດາກົນໄກປະສານງານ, ຊີ້ນໍາການຮ່ວມມືສອງຝ່າຍໃນບັນດາຂົງເຂດ: ການເມືອງ, ເສດຖະກິດ, ການປ້ອງກັນຊາດ, ວິທະຍາສາດ-ເຕັກໂນໂລຢີ, ວັດທະນະທໍາ, ການສຶກສາ-ບໍາລຸງສ້າງ.

leftcenterrightdel
ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ແລະທ່ານ Édouard Philippe ນາຍົກລັດຖະມົນຕີຝະລັ່ງ ກວດແຖວກຽດຕິຍົດກອງທັບປະຊາຊົນຫວຽດນາມ. ພາບ: ຈ້ອງຫາຍ.

ການນໍາສອງທ່ານຢ້ັງຢືນວ່າການຮ່ວມມືດ້ານເສດຖະກິດສືບຕໍ່ແມ່ນເສົາຄໍ້າບຸລິມະສິດໃນການພົວພັນສອງຝ່າຍ ແລະເນັ້ນໜັກວ່າຄວນເພີ່ມທະວີການຮ່ວມມື, ຊຸກຍູ້ບັນດາໂຄງການຈຸດສຸມ ເຊິ່ງສອງຝ່າຍພວມຜັນຂະຫຍາຍ ກໍ່ຄືເພີ່ມທະວີການພົວພັນ ຫວຽດນາມ-ສະຫະພາບເອີລົບ.

ສອງຝ່າຍເຫັນດີຊຸກຍູ້ການຮ່ວມມືລະຫວ່າງສອງປະເທດໃນການພັດທະນາລັດຖະບານເອເລັກໂຕນິກ ແລະຫັນການຄຸ້ມຄອງບໍລິຫານແຫ່ງລັດເປັນທັນສະໄໝ. ສອງຝ່າຍເຫັນດີເປັນເອກະພາບສ້າງເງື່ອນໄຂສົ່ງເສີມບັນດາວິສາຫະກິດສອງປະເທດເຊື່ອມຈອດການຮ່ວມມືດໍາເນີນທຸລະກິດ, ລົງທຶນ ຄື: ພື້ນຖານໂຄງລ່າງ, ພະລັງງານ, ການບິນ-ອາວະກາດ, ສາທາລະນະສຸກ, ວິທະຍາສາດ-ເຕັກໂນໂລຢີ, ສື່ສານ, ຮັບມືກັບການປ່ຽນແປງຂອງດິນຟ້າອາກາດ.

leftcenterrightdel
ທ່ານ ຫງວຽນຊວນຟຸກ ນາຍົກລັດຖະມົນຕີຫວຽດນາມ ພົບປະເຈລະຈາກັບທ່ານ Édouard Philippe ນາຍົກລັດຖະມົນຕີຝະລັ່ງ. ພາບ: ສໍານັກຂ່າວສານຫວຽດນາມ.

ສອງຝ່າຍປາດຖະໜາຢາກເພີ່ມທະວີການຮ່ວມມືດ້ານປ້ອງກັນຊາດ-ປ້ອງກັນຄວາມສະຫງົບ, ຊຸກຍູ້ບັນດາການຢ້ຽມຢາມຂອງກໍາປັ່ນທະຫານຝະລັ່ງ ມາຫວຽດນາມ, ໜູນຊ່ວຍຫວຽດນາມເຂົ້າຮ່ວມການເຄື່ອນໄຫວຮັກສາສັນຕິພາບຂອງສະຫະປະຊາຊາດ.

ໃນວັນດຽວກັນ, ທ່ານ ຫງວຽນຊວນຟຸກ ແລະທ່ານ Édouard Philippe ໄດ້ເປັນສັກຂີພິຍານພິທີລົງນາມ, ແລກປ່ຽນເອກະສານ, ຂໍ້ຕົກລົງຮ່ວມມືສະບັບຕ່າງໆລະຫວ່າງສອງປະເທດໃນຫຼາຍຂົງເຂດໃນນັ້ນມີການບໍາລຸງສ້າງ, ການພັດທະນາລັດຖະບານເອເລັກໂຕນິກ, ການຮ່ວມມືດ້ານສາທາລະນະສຸກ, ການຮັບມືກັບການປ່ຽນແປງຂອງດິນຟ້າອາກາດ, ການປົກປັກຮັກສາສິ່ງແວດລ້ອມ, ອາວະກາດ, ການຄຸ້ມຄອງຕົວເມືອງ, ການສະໜອງເຮືອບິນ Airbus, ພະລັງງານ.

ໂດຍ: ທູຈາງ