ສະເຫຼີມສະຫຼອງ 45 ປີ ແຫ່ງວັນສ້າງຕັ້ງການພົວພັນການທູດ ຫວຽດນາມ - ຍີ່ປຸ່ນ
ຕອນຄໍ່າວັນທີ 18 ກັນຍາ, ທີ່ຮ່າໂນ້ຍ, ສະມາຄົມມິດຕະພາບຫວຽດນາມ - ຍີ່ປຸ່ນ (ສະຫະພັນບັນດາອົງການຈັດຕັ້ງມິດຕະພາບຫວຽດນາມ) ໄດ້ສົມທົບກັບສະມາຄົມມິດຕະພາບ ຍີ່ປຸ່ນ-ຫວຽດນາມ, ສະຖານທູດຍີ່ປຸ່ນປະຈໍາຫວຽດນາມ ຈັດຕັ້ງພິທີສະເຫຼີມສະຫຼອງ 45 ປີ ແຫ່ງວັນສ້າງຕັ້ງການພົວພັນການທູດ ຫວຽດນາມ - ຍີ່ປຸ່ນ (21/9/1973 – 21/9/2018).
ທີ່ພິທີ, ທ່ານ ຟ້າມມິງຈິງ, ກໍາມະການກົມການເມືອງ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ປະທານກຸ່ມສະມາຊິກລັດຖະສະພາມິດຕະພາບຫວຽດນາມ - ຍີ່ປຸ່ນ ໄດ້ເນັ້ນໜັກເຖິງນໍ້າໃຈມິດຕະພາບ, ຄວາມສັດຊື່ບໍລິສຸດ ແລະຄວາມໄວ້ເນື້ອເຊື່ອໃຈຢ່າງສູງກ່ຽວກັບດ້ານການເມືອງແມ່ນພື້ນຖານທີ່ໝັ້ນແກ່ນໃຫ້ແກ່ການຮ່ວມມືອັນແໜ້ນແຟ້ນ ແລະມີປະສິດທິຜົນລະຫວ່່າງສອງປະເທດ. ທ່ານ ຟ້າມມິງຈິງ ໃຫ້ຮູ້ວ່່າ ໄປຄຽງຄູ່່ກັບການພົວພັນການທູດລະຫວ່າງລັດ ແລະປະຊາຊົນນັ້ນ, ການພົວພັນທາງການທູດລະຫວ່າງລັດຖະສະພາສອງປະເທດ ກໍ່ໄດ້ຮັບການປັບປຸງ ແລະພັດທະນາຢ່າງບໍ່ຢຸດຢັ້ງ.
|
|
ທ່ານ ຟ້າມມິງຈິງ ປະທານກຸ່ມສະມາຊິກລັດຖະສະພາມິດຕະພາບຫວຽດນາມ - ຍີ່ປຸ່ນ ກ່າວຄໍາເຫັນທີ່ພິທີ. ພາບ: ສໍານັກຂ່າວສານຫວຽດນາມ. |
ສ່ວນທ່ານ Umeda Kumio ເອກອັກຄະລັດຖະທູດຍີ່ປຸ່ນ ປະຈໍາຫວຽດນາມ ໃຫ້ຮູ້ວ່າເພື່ອເປັນການຂໍ່ານັບຮັບຕ້ອນເຫດການສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດລະຫວ່າງຫວຽດນາມ - ຍີ່ປຸ່ນ, ມາຮອດປັດຈຸບັນໄດ້ມີບັນດາກິດຈະກໍາໃນລະບົບການເຄື່ອນໄຫວສະເຫຼີມສະຫຼອງກວ່າ 120 ເຫດການໄດ້ຈັດຂຶ້ນຢູ່ສອງປະເທດແລ້ວ. ນອກຈາກນັ້ນ, ຮອດທ້າຍປີ 2018, ຄາດວ່າຈະໄດ້ຈັດຕັ້ງເຫດການຕື່ມອີກກວ່າ 50 ເຫດການ.
ແຫຼ່ງຄັດຈາກ vovworld.vn