ເພີ່ມທະວີຄວາມໄວ້ເນື້ອເຊື່ອໃຈ, ຄວາມເຂົ້າອົກເຂົ້າໃຈເຊິ່ງກັນ ແລະກັນລະຫວ່າງຊາວໜຸ່ມສອງປະເທດຫວຽດນາມ - ຈີນ
ກປ.ອອນໄລ - ຕອນເຊົ້າວັນທີ 14 ສິງຫາ, ທີ່ສໍານັກງານຄະນະພົວພັນຕ່າງປະເທດ, ທ່ານ ຮວ່າງບິ່ງກວນ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງໄດ້ຕ້ອນຮັບຄະນະຜູ້ແທນຂັ້ນສູງສູນກາງຊາວໜຸ່ມກອມມູນິດຈີນໂດຍທ່ານ Fu Zhenbang, ເລຂາສູນກາງຊາວໜຸ່ມກອມມູນິດຈີນ, ນໍາໜ້າເຂົ້າຮ່ວມການເຄື່ອນໄຫວ “ພົບປະມິດຕະພາບລະຫວ່າງຊາວໜຸ່ມຫວຽດນາມ - ຈີນ ຄັ້ງທີ 18” ທີ່ຈັດຂຶ້ນຢູ່ຫວຽດນາມ, ໃນລະຫວ່າງວັນທີ 13 - 19 ສິງຫາ 2018.
ທີ່ການຕ້ອນຮັບ, ທ່ານ ຮວ່າງບິ່ງກວນ ຕີລາຄາສູງການເຄື່ອນໄຫວພົບປະມິດຕະພາບລະຫວ່າງຊາວໜຸ່ມຫວຽດນາມ - ຈີນ ຄັ້ງທີ 18, ຖືນີ້ແມ່ນການເຄື່ອນໄຫວສໍາຄັນ, ປະກອບສ່ວນເຂົ້າໃນການຊຸກຍູ້ການຮ່ວມມື, ຄວາມໄວ້ເນື້ອເຊື່ອໃຈ ແລະຄວາມເຂົ້າໃຈເຊິ່ງກັນແລະກັນລະຫວ່າງຊາວໜຸ່ມສອງປະເທດເວົ້າສະເພາະ ແລະປະຊາຊົນສອງປະເທດເວົ້າລວມ. ທ່ານ ຮວ່າງບິ່ງກວນ ຢືນຢັນວ່າ, ການພົວພັນລະຫວ່າງສອງປະເທດແມ່ນຊັບສົມບັດອັນລໍ້າຄ່າໂດຍປະທານ ໂຮ່ຈິມິນ ແລະປະທານ ເໝົາເຈີຕຸງ ພ້ອມກັບການນໍາຮຸ່ນຕ່າງໆ ແລະປະຊາຊົນຂອງສອງປະເທດໄດ້ທຸ່ມເທເຫື່ອແຮງເພີ່ມພູນຄູນສ້າງ; ທ່ານກໍ່ປາດຖະໜາວ່າສູນກາງຊາວໜຸ່ມສອງປະເທດຈະເພີ່ມທະວີການຮ່ວມມືຕາມລວງເລິກ, ເພີ່ມທະວີການສຶກສາດ້ານອຸດົມຄະຕິໃຫ້ຊາວໜຸ່ມ, ຊຸກຍູ້ການຊອກຮູ້, ມີຫົວຄິດປະດິດສ້າງ, ເສີມຂະຫຍາຍບົດບາດ ແລະການເຂົ້າຮ່ວມຂອງຊາວໜຸ່ມໃນບັນດາຂົງເຂດໃໝ່ຄືການປະຕິວັດອຸດສາຫະກໍາ 4.0 ແລະການຕ້ານ “ການປະຕິວັດສີ”.
|
|
ຫົວໜ້າຄະນະພົວພັນຕ່າງປະເທດສູນກາງ ຮວ່າງບິ່ງກວນ ຕ້ອນຮັບທ່ານ Fu Zhenbang. ພາບ: ສໍານັກຂ່າວສານຫວຽດນາມ. |
ທີ່ການຕ້ອນຮັບ, ທ່ານ Fu Zhenbang ໃຫ້ຮູ້ວ່າ, ຄະນະການນໍາສູນກາງຊາວໜຸ່ມອາຍຸການໃໝ່ໄດ້ຊາບຊຶມຈິດໃຈ ແລະເນື້ອໃນຂອງກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນ ຢ່າງເລິກເຊິ່ງ, ສູ້ຊົນປະຕິບັດບົດບາດແມ່ນແຫຼ່ງກຳລັງວັງຊາຂອງພັກເປັນຢ່າງດີ, ຜັນຂະຫຍາຍບັນດາການເຄື່ອນໄຫວແທດຈິງໃນນັ້ນມີບັນດາການເຄື່ອນໄຫວສຶກສາດ້ານອຸດົມຄະຕິໃຫ້ແກ່ເຍົາວະຊົນ, ເພີ່ມທະວີ, ຊຸກຍູ້ການພົວພັນມິດຕະພາບກັບບັນດາປະເທດບ້ານໃກ້ເຮືອນຄຽງ, ໃນນັ້ນມີຫວຽດນາມ.
ໂດຍ: ຫງວຽນກຸກ