leftcenterrightdel

ທ່ານ ຮວ່າງບີ່ງກວນ ຕ້ອນຮັບທ່ານ Park Ro-byug, ເລຂາທິການໃຫຍ່ ICAPP ມາຢ້ຽມຢາມ ແລະເຮັດວຽກຢູ່ ຫວຽດນາມ. ພາບ: ສຳນັກຂ່າວສານຫວຽດນາມ.

ທ່ານ Park Ro-byug ໄດ້ແຈ້ງໃຫ້ຊາບກ່ຽວກັບການເຄື່ອນໄຫວຂອງ ICAPP ໃນໄລຍະຈະມາເຖິງ; ແລກປ່ຽນບັນດາທິດພັດທະນາເພື່ອແນໃສ່ຍົກສູງການເຄື່ອນໄຫວຢ່າງມີປະສິດທິຜົນ, ນຳ ICAPP ກາຍເປັນອົງການຈັດຕັ້ງຫຼາຍຝ່າຍມີລັກສະນະບັນຍັດນັບມື້ນັບແໜ້ນແຟ້ນຂອງບັນດາພັກການເມືອງຢູ່ພາກພື້ນ ອາຊີ. ທ່ານ Park Ro-byug ຕີລາຄາສູງ ແລະຂອບອົກຂອບໃຈບັນດາການປະກອບສ່ວນຢ່າງລຽນຕິດ, ແທດຈິງ, ມີປະສິດທິຜົນຂອງພັກກອມມູນິດຫວຽດນາມ ໃນບັນດາການເຄື່ອນໄຫວຂອງ ICAPP ເວົ້າລວມ ແລະຄະນະກຳມະການປະຈຳການ ICAPP ເວົ້າສະເພາະໃນຊຸມປີຜ່ານມາ; ສະແດງຄວາມປາດຖະໜາຢາກ ພັກກອມມູນິດຫວຽດນາມ, ດ້ວຍຖານະຕຳແໜ່ງເປັນສະມາຊິກຄະນະກຳມະການປະຈຳການ ICAPP, ຈະສືບຕໍ່ມີການປະກອບສ່ວນຢ່າງຕັ້ງໜ້າຫຼາຍຢ່າງເຂົ້າໃນວິວັດທະນາການພັດທະນາ ແລະບັນດາການເຄື່ອນໄຫວຂອງ ICAPP ໃນໄລຍະຈະມາເຖິງ.

ທ່ານ ຮວ່າງບີ່ງກວນ ຕີລາຄາສູງບັນດາບາດກ້າວພັດທະນາຂອງ ICAPP ໃນໄລຍະ 18 ປີຜ່ານມາ, ມຸ່ງໄປເຖິງເລື່ອງຫັນບັນດາເປົ້າໝາຍສຳຄັນຂອງ ICAPP ໃຫ້ປະກົດຜົນເປັນຈິງແມ່ນເພີ່ມທະວີຄວາມເຂົ້າອົກເຂົ້າໃຈ, ຄວາມໄວ້ເນື້ອເຊື່ອໃຈເຊິ່ງກັນ ແລະກັນລະຫວ່າງບັນດາພັກການເມືອງຢູ່ ອາຊີ, ຊຸກຍູ້ການຮ່ວມມື, ສ້າງຄວາມຮັບຮູ້ດ້ານການເມືອງລວມລະຫວ່າງພັກຕ່າງໆກ່ຽວກັບບັນດາບັນຫາຂອງພາກພື້ນຜ່ານບົດບາດພິເສດຂອງບັນດາພັກການເມືອງບົນເວທີການເມືອງຂອງບັນດາປະເທດ, ປະກອບສ່ວນສ້າງສະພາບແວດລ້ອມແຫ່ງສັນຕິພາບ, ສະຖຽນລະພາບ ແລະວັດທະນາຖາວອນຢູ່ພາກພື້ນ. ທ່ານ ຮວ່າງບີ່ງກວນ ຢືນຢັນວ່າ, ຫວຽດນາມ ຍາມໃດກໍ່ຖືເປັນສຳຄັນບົດບາດຂອງບັນດາເວທີປາໄສຫຼາຍຝ່າຍ, ໃນນັ້ນມີບັນດາເວທີປາໄສພັກການເມືອງຫຼາຍຝ່າຍຄື ICAPP; ເນັ້ນໜັກວ່າ ຫວຽດນາມ ໄດ້ ແລະຈະສືບຕໍ່ເຂົ້າຮ່ວມບັນດາການເຄື່ອນໄຫວຂອງ ICAPP ບົນຈິດໃຈຮັບຜິດຊອບ, ປະກອບສ່ວນສ້າງ ICAPP ໃຫ້ກາຍເປັນອົງການຈັດຕັ້ງພັກການເມືອງຫຼາຍຝ່າຍທີ່ໝັ້ນຄົງເຂັ້ມແຂງ.

ແປໂດຍ: ທູຮັ່ງ