ທ່ານນາຍົກລັດຖະມົນຕີ Shinzo Abe ໃຫ້ຮູ້ວ່າ ຍີ່ປຸ່ນ ຖືເປັນສໍາຄັນການພົວພັນກັບຫວຽດນາມ ແລະປາດຖະໜາຢາກເພີ່ມທະວີການພົວພັນຄູ່ຮ່ວມມືຍຸດທະສາດຢ່າງເລິກເຊິ່ງ, ກວ້າງຂວາງລະຫວ່າງສອງປະເທດ. ທ່ານນາຍົກລັດຖະມົນຕີຍີ່ປຸ່ນ ຖືວ່າສາຍພົວພັນລະຫວ່າງ ຍີ່ປຸ່ນ ແລະຫວຽດນາມ ໃນປັດຈຸບັນແມ່ນດີງາມທີ່ສຸດນັບແຕ່ກ່ອນມາຮອດປະຈຸບັນ, ທ່ານ Shinzo Abe ຫວັງວ່າໃນໄລຍະຈະມາເຖິງ, ສອງຝ່າຍຈະສືບຕໍ່ເພີ່ມທະວີການຮ່ວມມືໃນບັນດາຂົງເຂດຄື: ການປ້ອງກັນຊາດ-ປ້ອງກັນຄວາມສະຫງົບ, ການທູດ, ເສດຖະກິດ, ການພົບປະແລກປ່ຽນປະຊາຊົນ...

leftcenterrightdel
ທ່ານລັດຖະມົນຕີກະຊວງປ້ອງກັນປະເທດຫວຽດນາມ ໂງຊວນລິກ ແລະທ່ານນາຍົກລັດຖະມົນຕີຍີ່ປຸ່ນ Shinzo Abe. ພາບ: ທູຈາງ.

ທ່ານລັດຖະມົນຕີ ໂງຊວນລິກ ເນັ້ນໜັກວ່າ, ຫວຽດນາມ ຍາມໃດກໍ່ຕີລາຄາສູງບົດບາດ ແລະບັນດາຂໍ້ລິເລີ່ມຂອງຍີ່ປຸ່ນ; ສະໜັບສະໜູນຍີ່ປຸ່ນ ເພີ່ມທະວີການຮ່ວມມືກັບບັນດາປະເທດໃນພາກພື້ນອາຊີຕາເວັນອອກສ່ຽງໃຕ້ ແລະປາດຖະໜາວ່າ ຍີ່ປຸ່ນ ຈະປະກອບສ່ວນຕັ້ງໜ້າກວ່າອີກເຂົ້າໃນການຮັກສາສັນຕິພາບ, ສະຖຽນລະພາບຢູ່ພາກພື້ນ.

ທ່ານລັດຖະມົນຕີ ໂງຊວນລິກ ແຈ້ງໃຫ້ທ່ານນາຍົກລັດຖະມົນຕີ Shinzo Abe ຮັບຊາບກ່ຽວກັບໝາກຜົນການພົບປະເຈລະຈາກັບທ່ານລັດຖະມົນຕີກະຊວງປ້ອງກັນປະເທດຍີ່ປຸ່ນ  Onodera Itsunori; ຕີລາຄາເລື່ອງສອງຝ່າຍເຊັນຖະແຫຼງການວິໄສທັດຮ່ວມກ່ຽວກັບການຮ່ວມມືດ້ານປ້ອງກັນຊາດຈະປະກອບສ່ວນຊຸກຍູ້ການພົວພັນຮ່ວມມືດ້ານປ້ອງກັນຊາດສອງຝ່າຍເຂົ້າສູ່ລວງເລິກ ແລະແທດຈິງກວ່າເກົ່າ. ທ່ານລັດຖະມົນຕີ ໂງຊວນລິກ ປາດຖະໜາວ່າທ່ານນາຍົກລັດຖະມົນຕີ Shinzo Abe ຈະສືບຕໍ່ເອົາໃຈໃສ່, ສະໜັບສະໜູນເພື່ອໃຫ້ກະຊວງປ້ອງກັນປະເທດສອງປະເທດຮ່ວມມືຢ່າງແທດຈິງ, ມີປະສິດທິຜົນກວ່າອີກໃນໄລຍະຈະມາເຖິງ.

ກ່ອນໜ້ານັ້ນ, ທ່ານລັດຖະມົນຕີ ໂງຊວນລິກ ໄດ້ມີການພົບປະເຈລະຈາກັບທ່ານ Onodera Itsunori ລັດຖະມົນຕີກະຊວງປ້ອງກັນປະເທດຍີ່ປຸ່ນ.

ທີ່ການພົບປະເຈລະຈາ, ລັດຖະມົນຕີສອງທ່ານໄດ້ແລກປ່ຽນກ່ຽວກັບສະພາບຄວາມໝັ້ນຄົງຢູ່ພາກພື້ນ ເຊິ່ງຕ່າງຝ່າຍຕ່າງມີຄວາມສົນໃຈ. ທ່ານ Onodera Itsunori ເນັ້ນໜັກວ່າ ຍີ່ປຸ່ນ ປາດຖະໜາຢາກເພີ່ມທະວີການສົມທົບກັນກັບຫວຽດນາມ ໃນບັນດາຄວາມມານະພະຍາຍາມ ໂດຍອີງໃສ່ “ຍຸດທະສາດມະຫາສະໝຸດອິນເດຍ-ປາຊີຟິກ ອິດສະຫຼະພາບ ແລະເປີດກວ້າງ”. ທ່ານລັດຖະມົນຕີ ໂງຊວນລິກ ຖືວ່າເລື່ອງຮັກສາສັນຕິພາບ, ສະຖຽນລະພາບຢູ່ພາກພື້ນ, ຄວາມເສລີໃນການເດີນເຮືອ, ການບິນບົນພື້ນຖານກົດໝາຍຢູ່ພາກພື້ນດັ່ງກ່າວແມ່ນສໍາຄັນທີ່ສຸດ.

leftcenterrightdel
ລັດຖະມົນຕີສອງທ່ານ ເຊັນຖະແຫຼງການວິໄສທັດຮ່ວມກ່ຽວກັບການຮ່ວມມືດ້ານປ້ອງກັນຊາດ ມຸ່ງໄປເຖິງທົດສະວັດຕໍ່ໜ້າ. ພາບ: ທູຈາງ.

ລັດຖະມົນຕີສອງທ່ານ ຕີລາຄາສູງການພົວພັນຮ່ວມມືດ້ານປ້ອງກັນຊາດຫວຽດນາມ-ຍີ່ປຸ່ນ ໄດ້ພັດທະນາໃນຫຼາຍຂົງເຂດ, ໂດຍສະເພາະແມ່ນການຮ່ວມມືລະຫວ່າງ ເຫຼົ່າທັບ, ເຫຼົ່າຮົບ.

ທີ່ການພົບປະເຈລະຈາ, ລັດຖະມົນຕີສອງທ່ານໄດ້ເຊັນຖະແຫຼງການວິໄສທັດຮ່ວມກ່ຽວກັບການພົວພັນດ້ານປ້ອງກັນຊາດ ຫວຽດນາມ-ຍີ່ປຸ່ນ ມຸ່ງໄປເຖິງທົດສະວັດຕໍ່ໜ້າເພື່ອແນໃສ່ກໍານົດທິດ ແລະຊຸກຍູ້ການຜັນຂະຫຍາຍບັນດາເນື້ອໃນຮ່ວມມືດ້ານປ້ອງກັນຊາດສອງຝ່າຍລະຫວ່າງສອງປະເທດໃນໄລຍະຈະມາເຖິງ.

 

ແປໂດຍ: ທູຈາງ