ປະຊາຄົມນັກທຸລະກິດຊາວຫວຽດນາມ ຢູ່ ອົດສະຕາລີ ຍາມໃດກໍ່ມຸ່ງໄປສູ່ບ້ານເກີດເມືອງນອນ, ປະເທດຊາດ
ກປ.ອອນໄລ - ຕອນເຊົ້າວັນທີ 17 ມີນາ, ຢູ່ນະຄອນ Sydney, ອົດສະຕາລີ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄດ້ພົບປະກັບບັນດາຜູ້ແທນທີ່ດີເດັ່ນຂອງສະມາຄົມນັກທຸລະກິດຫວຽດນາມ ຢູ່ ອົດສະຕາລີ ແລະສະໂມສອນບັນດານັກວິທະຍາສາດຫວຽດນາມ ຢູ່ Queensland.
ຕາງໜ້າຄະນະຜູ້ແທນນັກທຸລະກິດ, ທ່ານ ເຈິ່ນບ໋າຟຸກ, ປະທານສະມາຄົມວິສາຫະກິດຫວຽດນາມ ຢູ່ອົດສະຕາລີ ໄດ້ລາຍງານ ຕໍ່ທ່ານນາຍົກລັດຖະມົນຕີ ຫງວຽນຊວນຟຸກ ຮັບຊາບກ່ຽວກັບສະພາບການເຄື່ອນໄຫວຂອງສະມາຄົມ, ຢືນຢັນວ່າ ປະຊາຄົມນັກທຸລະກິດຊາວຫວຽດນາມ ຢູ່ ອົດສະຕາລີ ຍາມໃດກໍ່ມຸ່ງໄປສູ່ບ້ານເກີດເມືອງນອນ, ປະເທດຊາດ. ທ່ານກໍ່ໃຫ້ຮູ້ຕື່ມອີກວ່າ, ໄລຍະຜ່ານມາ, ບັນດາວິສາຫະກິດຊາວຫວຽດນາມ ໄດ້ຕັ້ງໜ້າເຂົ້າຮ່ວມການຂົນຂວາຍ, ໂຄສະນາໃຫ້ຜະລິດຕະພັນກະເສດຫວຽດນາມ ຢູ່ ອົດສະຕາລີ. ທ່ານ ເຈິ່ນບ໋າຟຸກ ສະແດງຄວາມປິຕິຊົມຊື່ນຕໍ່ເລື່ອງ ຫວຽດນາມ - ອົດສະຕາລີ ໄດ້ກາຍເປັນຄູ່ຮ່ວມມືຍຸດທະສາດ, ຕາມນັ້ນ, ປະຊາຄົມຊາວຫວຽດນາມ ຈະໄດ້ຮັບຄວາມເອົາໃຈໃສ່ຈາກລັດຖະບານ ອົດສະຕາລີ ກວ່າອີກ.
|
|
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ (ເບື້ອງຂວາ) ແລະທ່ານ ເຈິ່ນບ໋າຟຸກ, ປະທານສະມາຄົມວິສາຫະກິດຫວຽດນາມ ຢູ່ ອົດສະຕາລີ. ພາບ: ສໍານັກຂ່າວສານຫວຽດນາມ. |
ຕີລາຄາສູງບັນດາການເຄື່ອນໄຫວຂອງສະມາຄົມ, ທ່ານນາຍົກລັດຖະມົນຕີ ຫງວຽນຊວນຟຸກ ສະແດງຄວາມເພິ່ງພໍໃຈເມື່ອໄດ້ເຫັນປະຈັກຕາປະຊາຄົມຊາວຫວຽດນາມ ຢູ່ ອົດສະຕາລີ, ໃນນັ້ນມີປະຊາຄົມນັກທຸລະກິດ, ນັບມື້ນັບຢັ້ງຢືນໄດ້ທີ່ຕັ້ງຂອງຕົນຢູ່ອົດສະຕາລີ, ປະກອບສ່ວນສໍາຄັນເຂົ້າໃນການຊຸກຍູ້ການຮ່ວມມືດ້ານເສດຖະກິດລະຫວ່າງຫວຽດນາມ ແລະອົດສະຕາລີ.
|
|
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ, ທ່ານ ເຈິ່ນບ໋າຟຸກ, ປະທານສະມາຄົມວິສາຫະກິດຫວຽດນາມ ຢູ່ ອົດສະຕາລີ ພ້ອມກັບບັນດາຜູ້ແທນ. ພາບ: ສໍານັກຂ່າວສານຫວຽດນາມ. |
ໃນວັນດຽວກັນ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ມີການພົບປະກັບບັນດາຜູ້ແທນຂອງສະໂມສອນບັນດານັກວິທະຍາສາດຫວຽດນາມ ຢູ່ Queensland. ທ່ານນາຍົກລັດຖະມົນຕີ ຫງວຽນຊວນຟຸກ ຖືວ່າການສ້າງຕັ້ງສະມາຄົມປັນຍາຊົນຄົນຫວຽດນາມ ຢູ່ ລັດ Queensland ແມ່ນສິ່ງເປັນໜ້ານັບຖື, ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ການພົວພັນຮ່ວມ ມືອັນດີງາມລະຫວ່າງຫວຽດນາມ ແລະອົດສະຕາລີ.
ທີ່ການພົບປະ, ທ່ານສາດສະດາຈານ ຫງວຽນວັນແອງ (ມະຫາວິທະຍາໄລ Queensland) ໃຫ້ຮູ້ວ່າ, ວົງການປັນຍາຊົນຫວຽດນາມ ຢູ່ ອົດສະຕາລີ ມີຄວາມສຸດຈິດສຸດໃຈ, ປາດຖະໜາຢາກປະກອບສ່ວນເຂົ້າໃນການສ້າງສາປະເທດຊາດ ແລະຢາກມີກາລະໂອກາດອຸທິດສ່ວນໃຫ້ແກ່ປະເທດຊາດ.
ແປໂດຍ: ເຈິ່ນຮວ່ຽນ