ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ໄປເຖິງ Canberra ເລີ່ມຕ້ົນການຢ້ຽມຢາມ ອົດສະຕາລີ ຢ່າງເປັນທາງການ
ກປ.ອອນໄລ - ວັນທີ 14 ມີນາ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ພ້ອມດ້ວຍພັນລະຍາ ໄດ້ນໍາໜ້າຄະນະຜູ້ແທນຂັ້ນສູງຫວຽດນາມ ໄປຮອດສະໜາມ ບິນການທະຫານ Fairbairn ຢູ່ນະຄອນຫຼວງ Canberra, ເລີ່ມຕ້ົນການຢ້ຽມຢາມ ອົດສະຕາລີ ຢ່າງເປັນທາງການ ແລະເຂົ້າຮ່ວມກອງປະຊຸມຂັ້ນສູງພິເສດ ອາຊຽນ-ອົດສະຕາລີ ຕາມຄໍາເຊີນຂອງທ່ານ Malcom Turnbull, ນາຍົກລັດຖະມົນຕີອົດສະຕາລີ.
ພາຍຫຼັງໄປຮອດນະຄອນຫຼວງ Canberra, ຕອນບ່າຍວັນທີ 14 ມີນາ, ທ່ານນາຍົກລັດຖະມົນຕີ ຫງວຽນຊວນຟຸກ ໄດ້ໄປຢ້ຽມຢາມ ແລະໂອ້ລົມກັບຄູອາຈານ ແລະນັກສໍາມະນາກອນ ມະຫາວິທະຍາໄລແຫ່ງຊາດ ອົດສະຕາລີ (ANU).
ທ່ານນາຍົກລັດຖະມົນຕີ ຕີລາຄາສູງການໜູນຊ່ວຍ, ການຮ່ວມມືຂອງອົດສະຕາລີສໍາລັບຫວຽດນາມ, ໃນນັ້ນມີຂົງເຂດການສຶກສາ, ກະສິກໍາເຕັກໂນໂລຢີສູງ, ການຮັບມືກັບການປ່ຽນແປງຂອງດິນຟ້າອາກາດ. ສອງປະເທດໄດ້ຮ່ວມມືກັນຢູ່ບັນດາເວທີປາໄສຫຼາຍຝ່າຍ ແລະພ້ອມກັນເຂົ້າຮ່ວມໃນສັນຍາການຄ້າ ແລະການລົງທຶນຢູ່ພາກພື້ນຫຼາຍສະບັບ, ໃນນັ້ນມີສັນຍາຄູ່ຮ່ວມມືຮອບດ້ານ ແລະກ້າວໜ້າຂ້າມປາຊີຟິກ (CPTPP). ສອງປະເທດກໍ່ພ້ອມກັນແບ່ງປັນທັດສະນະໃນບັນດາບັນຫາທີ່ກ່ຽວຂ້ອງເຖິງການຮັກສາສັນຕິພາບ, ຮັບປະກັນຄວາມໝັ້ນຄົງ ໃນພາກພື້ນ, ໃນນັ້ນມີທະເລຕາເວັນອອກ.
|
|
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ພ້ອມດ້ວຍບັນດາຜູ້ແທນຢູ່ມະຫາວິທະຍາໄລແຫ່ງຊາດ ອົດສະຕາລີ. ພາບ: ສໍານັກຂ່າວສານຫວຽດນາມ. |
ກ່ຽວກັບແງ່ຫວັງການຮ່ວມມືດ້ານການສຶກສາລະຫວ່າງສອງປະເທດ, ທ່ານນາຍົກລັດຖະມົນຕີ ສະແດງຄວາມປາດຖະໜາວ່າ ມະຫາວິທະຍາໄລແຫ່ງຊາດ ອົດສະຕາລີ ສືບຕໍ່ເປີດກ້ວາງການຮ່ວມສໍາພັນກັບບັນດາຮາກຖານສຶກສາບຳລຸງສ້າງຂອງຫວຽດນາມ ໃນການແບ່ງປັນບົດຮຽນ, ຮ່ວມມືຄົ້ນຄວ້າວິທະຍາສາດ ແລະແລກປ່ຽນນັກສຶກສາ.
ເນັ້ນໜັກເຖິງຄວາມສໍາຄັນຂອງການພົວພັນຄູ່ຮ່ວມມືຍຸດທະສາດຍາວນານ, ທ່ານນາຍົກລັດຖະມົນຕີ ຖືວ່າອີງໃສ່ພື້ນຖານຕົ້ນຕໍແມ່ນແຫຼ່ງຊັບພະຍາກອນມະນຸດ ໄດ້ບໍາລຸງສ້າງຢູ່ປະເທດນັ້ນ, ອົດສະຕາລີ ໄດ້ໄປກ່ອນໃນເສັ້ນທາງນີ້ ແລະນັ້ນແມ່ນພື້ນຖານໝັ້ນຄົງທີ່ສຸດໃຫ້ແກ່ສາຍພົວພັນອັນດີງາມລະຫວ່າງ ຫວຽດນາມ-ອົດສະຕາລີ.
ຕອນບ່າຍວັນດຽວກັນ, ທ່ານນາຍົກລັດຖະມົນຕີ ຫງວຽນຊວນຟຸກ ແລະພັນລະຍາ ພ້ອມດ້ວຍຄະນະຜູ້ແທນຂັ້ນສູງຫວຽດນາມ ໄດ້ມີການພົບປະກັບພະນັກງານ, ພາລະກອນສະຖານທູດຫວຽດນາມ ແລະຕາງໜ້າປະຊາຄົມຊາວຫວຽດນາມ ອາໄສຢູ່ ອົດສະຕາລີ.
ແປໂດຍ: ທູຈາງ