ທ່ານນາງ ຫງວຽນທິກິມເງິນ ປະທານສະພາແຫ່ງຊາດຫວຽດນາມ ເຂົ້າຮ່ວມ. ທ່ານພົນໂທ ໂຕເລິມ, ກໍາມະການກົມການເມືອງ, ເລຂາຄະນະພັກຕໍາຫຼວດປະຊາຊົນສູນກາງ, ລັດຖະມົນຕີກະຊວງຕໍາຫຼວດຫວຽດນາມ ເປັນປະທານພິທີສະເຫຼີມສະຫຼອງ. ເຂົ້າຮ່ວມຍັງມີການນໍາຈາກບັນດາອົງການສູນກາງ, ທ້ອງຖິ່ນ...

ກ່າວຄໍາເຫັນທີ່ພິທີ, ທ່ານພົນໂທ ໂຕເລິມ ຊີ້ແຈ້ງວ່າ: ວັນທີ 11 ມີນາ 1948, ໃນຊ່ອງຈົດໝາຍທີ່ສົ່ງໃຫ້ຫົວໜ້າກອງບັນຊາການຕໍາຫຼວດເຂດ XII, ລຸງໂຮ່ ໄດ້ຊີ້ແຈ້ງຖານະຂອງ “ຕໍາຫຼວດປະຕິວັດ” ນັ້ນແມ່ນ “ສຳລັບຕົນເອງ, ຕ້ອງດຸໝັ່ນ, ປະຢັດ, ສັດ, ທ່ຽງ. ສຳລັບເພື່ອນຮ່ວມກອງ, ຕ້ອງຮັກແພງ, ຊ່ວຍເຫຼືອເຊິ່ງກັນ ແລະກັນ, ສຳລັບລັດຖະບານ, ຕ້ອງຈົງຮັກພັກດີຢ່າງເດັດຂາດ. ສຳລັບປະຊາຊົນ, ຕ້ອງເຄົາລົບນັບຖື, ມີມາລະຍາດດີ. ສຳລັບວຽກງານ, ຕ້ອງໝົດຈິດໝົດໃຈ. ສຳລັບສັດຕູ, ຕ້ອງເດັດດ່ຽວ, ສະຫຼາດຄ່ອງແຄ້ວ”.

leftcenterrightdel
ທ່ານນາງ ຫງວຽນທິກິມເງິນ ປະທານສະພາແຫ່ງຊາດ ບັນທຶກໃສ່ປຶ້ມອະນຸສອນຢູ່ເຂດອະນຸສອນສະຖານຄໍາສັ່ງສອນຫົກຂໍ້ ຂອງ ລຸງໂຮ່ ສຳລັບຕໍາຫຼວດປະຊາຊົນ. ພາບ: ຈ໋ຽນຖັ໋ງ-ຕຽນດາດ.

ກ່າວຄໍາເຫັນທີ່ພິທີ, ທ່ານນາງ ຫງວຽນທິກິມເງິນ ຕີລາຄາວ່າ, ນີ້ແມ່ນມໍລະດົກດ້ານຈິດໃຈທີີ່ລໍ້າຄ່າທີ່ສຸດ, ແມ່ນເຂັມຊີ້ທິດໃຫ້ທຸກການເຄື່ອນໄຫວຂອງກໍາລັງຕໍາຫຼວດປະຊາຊົນ, ແມ່ນບັນທັດຖານດ້ານຄຸນສົມບັດ, ວິຖິຊີວິດ, ທິດນຳການກະທໍາ, ມາດຕະການ ປະຕິບັດວຽກງານ, ທ່າທີກິລິຍາການປະພຶດເຊິ່ງພະນັກງານ, ນັກຮົບຕໍາຫຼວດປະຊາຊົນແຕ່ລະຄົນເຖິງວ່າຈະຢູ່ຖານະຕໍາແໜ່ງໃດ, ສະພາບການໃດກໍ່ລ້ວນແຕ່ຕ້ອງມານະພະຍາຍາມເຝິກຝົນຫຼໍ່ຫຼອມ, ສູ້ຊົນປະຕິບັດ ແລະຕ້ອງປະຕິບັດໃຫ້ໄດ້.

ຕາມທ່ານນາງ ຫງວຽນທິກິມເງິນ ແລ້ວ, ໃນຕະຫຼອດໄລຍະ 70 ປີຜ່ານມາ,  ຄໍາສັ່ງສອນຫົກຂໍ້ ຂອງ ລຸງໂຮ່ ຍາມໃດກໍ່ໄດ້ຮັບການຊີ້ນໍາ, ນໍາພາ, ຊາບຊຶມ, ປະຕິບັດຢ່າງເຂັ້ມງວດຈາກ ພັກ, ລັດ ແລະກໍາລັງຕໍາຫຼວດດ້ວຍຫຼາຍຮູບການ, ມາດຕະການທີ່ມີຫົວຄິດປະດິດສ້າງ, ມີເນື້ອໃນທີ່ອຸດົມສົມບຸນ, ແທ້ຈິງ. ພາຍໃຕ້ການຊີ້ນຳ, ນໍາພາ, ສຶກສາອົບຮົມ, ເຝິກຝົນຫຼໍ່ຫຼອມຂອງ ພັກ ແລະລຸງໂຮ່ ທີ່ແສນເຄົາລົບຮັກ, ພະນັກງານ, ນັກຮົບຕໍາຫຼວດປະຊາຊົນລຸ້ນຕ່າງໆໄດ້ເຝິກຝົນຫຼໍ່ຫຼອມຖານະ “ຕໍາຫຼວດປະຕິວັດ” ຢ່າງບໍ່ຢຸດຢັ້ງ, ໄດ້ເພີ່ມພູນຄູນສ້າງທາດແທ້ ແລະມູນເຊື້ອທີ່ມີກຽດສະຫງ່າ.

ຕາງໜ້າການນໍາພັກ, ລັດ, ທ່ານນາງ ຫງວຽນທິກິມເງິນ ໄດ້ຮັບຮູ້, ຍ້ອງຍໍສັນລະເສີນບັນດາຜົນງານ, ວິລະກຳຂອງກໍາລັງຕໍາຫຼວດປະຊາຊົນ, ພ້ອມກັບບັນດາໝາກຜົນທີ່ກໍາລັງຕໍາຫຼວດປະຊາຊົນບັນລຸໄດ້ໃນການຮໍ່າຮຽນ, ປະຕິບັດຄໍາສັ່ງສອນຫົກຂໍ້ຂອງ ລຸງໂຮ່ ສຳລັບຕໍາຫຼວດປະຊາຊົນໃນຕະຫຼອດໄລຍະ 70 ປີຜ່ານມາ.

ໃນໄລຍະຈະມາເຖິງ, ທ່ານນາງ ຫງວຽນທິກິມເງິນ ໄດ້ສະແດງຄວາມປາດຖະໜາວ່າ, ກໍາລັງຕໍາຫຼວດປະຊາຊົນຄວນເສີມຂະຫຍາຍມູນເຊື້ອສະຫງ່າອົງອາດ, ສະຫງ່າລາສີ ແລະຜົນງານທີ່ບັນລຸໄດ້, ແກ້ໄຂບັນດາບັນຫາທີ່ຍັງຄົງຄ້າງ, ຈໍາກັດ; ສືບຕໍ່ໂຄສະນາ, ສຶກສາເນື້ອໃນ, ຄຸນຄ່າ ແລະຄວາມໝາຍປະຫວັດສາດຂອງຄໍາສັ່ງສອນຫົກຂໍ້ທີ່ ລຸງໂຮ່ ໄດ້ສອນໃຫ້ຕໍາຫຼວດປະຊາຊົນ ເຖິງພະນັກງານ, ນັກຮົບແຕ່ລະຄົນ.

ທ່ານນາງ ຫງວຽນທິກິມເງິນ ສະແດງຄວາມເຊື່ອໝັ້ນວ່າ, ພາຍໃຕ້ການນໍາພາຂອງພັກ, ເສີມຂະຫຍາຍມູນເຊື້ອວິລະຊົນທີ່ສະຫງ່າລາສີ, ເຖິງວ່າໃນສະພາບການໃດ, ປະສົບກັບຄວາມຫຍຸ້ງຍາກ, ລຳບາກກາກກໍາຄືແນວໃດຕໍາຫຼວດປະຊາຊົນ ຫວຽດນາມ  ກໍ່ເປັນຈິດໜຶ່ງໃຈດຽວຈົງຮັກພັກດີຢ່າງເດັດຂາດຕໍ່ປະເທດຊາດ ແລະປະຊາຊົນ, ຕໍ່ພັກ ແລະລັດ; ສືບຕໍ່ຮໍ່າຮຽນ, ປະຕິບັດຄໍາສັ່ງສອນຫົກຂໍ້ຂອງລຸງໂຮ່, ຍາມໃດກໍ່ປະຕິບັດສໍາເລັດທຸກໜ້າທີ່ ເຊິ່ງ ພັກ, ລັດ ແລະປະຊາຊົນໄດ້ມອບໝາຍໃຫ້ເປັນຢ່າງດີ...

ເນື່ອງໃນໂອກາດນີ້, ທ່ານນາງ ຫງວຽນທິກິມເງິນ ປະທານສະພາແຫ່ງຊາດ ໄດ້ບັນທຶກໃສ່ປຶ້ມອະນຸສອນ, ຕັດແຖບຜ້າ ແລະປູກຕົ້ນໄມ້ໃນເຂດອະນຸສອນສະຖານຄໍາສັ່ງສອນຫົກຂໍ້ຂອງ ລຸງໂຮ່ ສຳລັບຕໍາຫຼວດປະຊາຊົນ ຢູ່ຕາແສງ ຍ໊ານາມ, ເມືອງ ເຕິນອຽນ, ແຂວງ ບັກຢາງ.

 

ແປໂດຍ: ເກື່ອງດັ້ງ