ທີ່ການຕ້ອນຮັບ, ທ່ານເລຂາທິການໃຫຍ່ ຫງວຽນຟູ໋ຈ້ອງ ຖືວ່າຫວຽດນາມ ແລະຝຣັ່ງ ມີການພົວພັນມາແຕ່ດົນນານກ່ຽວກັບດ້ານປະຫວັດສາດ, ວັດທະນະທໍາ, ມີການພົວພັນມິດຕະພາບທີ່ເປັນມູນເຊື້ອອັນດີງາມ, ມີຜົນປະໂຫຍດຫຼາຍຢ່າງທີ່ຄ້າຍຄືກັນ ແລະມີຄວາມສາມາດບົ່ມຊ້ອນອັນໃຫຍ່ຫຼວງເພື່ອເປີດກວ້າງ ແລະເພີ່ມທະວີການຮ່ວມມືໃນບັນດາຂົງເຂດ; ຢືນຢັນຫວຽດນາມ ຖືເປັນສໍາຄັນທີ່ຕັ້ງ, ບົດບາດຂອງຝຣັ່ງ ຢູ່ເອີລົບ, ອາຊີ ແລະໃນໂລກ, ພ້ອມທັງປາດຖະໜາຢາກເພີ່ມທະວີການພົວພັນມິດຕະພາບ ແລະການຮ່ວມມືກັບຝຣັ່ງ ໃນໄລຍະຈະມາເຖິງກວ່າອີກ. ທ່ານເລຂາທິການໃຫຍ່ ຫງວຽນຟູ໋ຈ້ອງ ເນັ້ນໜັກວ່າ, ປີ 2018 ເປັນປີສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດ ແລະ 5 ປີແຫ່ງການພົວພັນຄູ່ຮ່ວມມືຍຸດທະສາດ, ສອງຝ່າຍຄວນເພີ່ມທະວີການແລກປ່ຽນຂັ້ນສູງ, ຍູ້ແຮງການພົບປະແລກປ່ຽນ, ການຮ່ວມມືລະຫວ່າງບັນດາຂະແໜງການ, ທຸກຂັ້ນ, ເພື່ອໃຫ້ການພົວພັນສອງຝ່າຍມີບາດກ້າວພັດທະນາໃໝ່. ທ່ານເລຂາທິການໃຫຍ່ ຫງວຽນຟູ໋ຈ້ອງ ອວຍພອນທ່ານ Bertrand Lortholary ປະຕິບັດສໍາເລັດໜ້າທີ່ເປັນຂົວເຊື່ອມຕໍ່ສໍາຄັນ, ປະກອບສ່ວນຢ່າງຕັ້ງໜ້າເຂົ້າໃນການເພີ່ມທະວີການພົວພັນຄູ່ຮ່ວມມືຍຸດທະສາດຫວຽດນາມ-ຝຣັ່ງ ໃນໄລຍະຈະມາເຖິງ.

leftcenterrightdel
ທ່ານເລຂາທິການໃຫຍ່ ຫງວຽນຟູ໋ຈ້ອງ ຕ້ອນຮັບທ່ານ Bertrand Lortholary  ເອກອັກຄະລັດຖະທູດ ສາທາລະນະລັດ ຝຣັ່ງ ປະຈໍາ ສສ. ຫວຽດນາມ. ພາບ: ສໍານັກຂ່າວສານຫວຽດນາມ.

ທ່ານເອກອັກຄະລັດຖະທູດ Bertrand Lortholary ສະແດງຄວາມເປັນກຽດທີ່ໄດ້ເຂົ້າຢ້ຽມຂໍ່ານັບທ່ານເລຂາທິການໃຫຍ່ ຫງວຽນຟູ໋ຈ້ອງ; ພ້ອມທັງຢືນຢັນວ່າ ຝຣັ່ງ ແລະຫວຽດນາມ ມີການພົວພັນມາແຕ່ດົນນານ, ມີຜົນປະໂຫຍດຍຸດທະສາດຄ້າຍຄືກັນ; ການນໍາ ຝຣັ່ງ ຖືເປັນສໍາຄັນທີ່ຕັ້ງ, ບົດບາດຂອງຫວຽດນາມ ໃນພາກພື້ນ, ຕີລາຄາສູງພື້ນຖານເສດຖະກິດທີ່ກໍາລັງພັດທະນາຂະຫຍັນຂັນເຄື່ອນຂອງຫວຽດນາມ, ປາດຖະໜາຢາກເພີ່ມທະວີການພົວພັນລະຫວ່າງສອງປະເທດໃນໄລຍະຈະມາເຖິງ. ພ້ອມກັບເລື່ອງຊຸກຍູ້ການແລກປ່ຽນຂັ້ນສູງ, ທ່ານ Bertrand Lortholary ສະເໜີສອງຝ່າຍຍູ້ແຮງການຮ່ວມມືໃນບັນດາບັນຫາຍຸດທະສາດ, ການຮ່ວມມືດ້ານເສດຖະກິດ, ການບິນ, ການຄົ້ນຄວ້າອາວະກາດ, ການປ້ອງກັນຊາດ, ວັດທະນະທໍາ ແລະພົບປະແລກປ່ຽນຊາວໜຸ່ມ, ສ້າງຂີດໝາຍແທດຈິງທີ່ມີຄວາມໝາຍປະຫວັດສາດໃນປີສະເຫຼີມສະຫຼອງ 45 ປີແຫ່ງວັນສ້າງຕັ້ງການພົວພັນທາງການທູດລະຫວ່າງສອງປະເທດ. ທ່ານ Bertrand Lortholary  ອວຍພອນທ່ານເລຂາທິການໃຫຍ່ ຫງວຽນຟູ໋ຈ້ອງ, ພັກກອມມູນິດຫວຽດນາມ ແລະປະຊາຊົນຫວຽດນາມ ຕ້ອນຮັບບຸນປີໃໝ່ປະຈໍາຊາດປີຈໍ 2018 ດ້ວຍຜົນສໍາເລັດໃໝ່ຫຼາຍຢ່າງ.

 

ແປໂດຍ: ຮວ່າງເຈື່ອງ