ຕອນເຊົ້າວັນທີ 9 ມັງກອນ, ຢູ່ຫໍສະພາແຫ່ງຊາດ, ໃນການຕ້ອນຮັບທ່ານເອກອັກຄະລັດຖະທູດອາເມລິກາປະຈຳຫວຽດນາມ, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ໄດ້ສະແດງຄວາມເຊື່ອໝັ້ນວ່າ, ທ່ານເອກອັກຄະລັດຖະທູດ Daniel J.Kritenbrink ຈະປະຕິບັດສຳເລັດໜ້າທີ່ຂອງຕົນ ແລະຈະປະກອບສ່ວນເຂົ້າໃນການເພີ່ມທະວີການພົວພັນລະຫວ່າງສອງປະເທດເວົ້າລວມ ແລະລະຫວ່າງສອງອົງການນິຕິບັນຍັດສອງປະເທດເວົ້າສະເພາະ.

ທ່ານນາງປະທານສະພາແຫ່ງຊາດ ຫງວຽນທິກິມເງິນ ຢືນຢັນວ່າ, ໃນນະໂຍບາຍພົວພັນຕ່າງປະເທດ, ຫວຽດນາມ ຍາມໃດກໍ່ຖືການພົວພັນກັບອາເມລິກາ ເປັນສຳຄັນ; ປາດຖະໜາຢາກເພີ່ມທະວີ ແລະເຮັດໃຫ້ການພົວພັນຄູ່ຮ່ວມມືຮອບດ້ານກັບອາເມລິກາ ຕາມທິດແທດຈິງ, ມີປະສິດທິຜົນໃນທັງສາມດ້ານສອງຝ່າຍ, ພາກພື້ນ ແລະທົ່ວໂລກເລິກເຊິ່ງກ່ວາອີກ.

leftcenterrightdel
ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ແລະທ່ານເອກອັກຄະລັດຖະທູດອາເມລິກາ Daniel J.Kritenbrink ທີ່ການຕ້ອນຮັບ. ພາບ: ທຸ່ຍເຢືອງ.

ທ່ານເອກອັກຄະລັດຖະທູດ Daniel J.Kritenbrink ຢັ້ງຢືນວ່າຫວຽດນາມ ແມ່ນຄູ່ຮ່ວມມືສໍາຄັນຂອງອາເມລິກາ.  ແລະເນັ້ນໜັກວ່າ, ໃນປີ 2018, ຕົນເອງຈະຮ່ວມມືຢ່າງແໜ້ນແຟ້ນກັບທ່ານນາງປະທານສະພາແຫ່ງຊາດ ຫງວຽນທິກິມເງິນ ແລະສະພາແຫ່ງຊາດຫວຽດນາມ ເພື່ອຊຸກຍູ້ການພົວພັນລະຫວ່າງສອງປະເທດໃນບັນດາຂົງເຂດການເມືອງ, ເສດຖະກິດ, ການຄ້າ, ການພົວພັນຕ່າງປະເທດ, ການພົບປະແລກປ່ຽນປະຊາຊົນ.

ທ່ານນາງປະທານສະພາແຫ່ງຊາດ ຫງວຽນທິກິມເງິນ ຕີລາຄາວ່າ, ການພົວພັນຄູ່ຮ່ວມມືຮອບດ້ານລະຫວ່າງສອງປະເທດບັນລຸໄດ້ບັນດາໝາກຜົນໃດໜຶ່ງໃນບັນດາຂົງເຂດ. ການຮ່ວມມືໃນຂົງເຂດປ້ອງກັນຊາດ-ປ້ອງກັນຄວາມສະຫງົບ ໄດ້ມີບັນດາບາດກ້າວໃໝ່, ແທດຈິງ ແລະຍັງມີຄວາມສາມາດບົ່ມຊ້ອນພັດທະນາຫຼາຍຢ່າງ. ຫວຽດນາມ ປາດຖະໜາຢາກສືບຕໍ່ຮ່ວມມືກັບອາເມລິກາ ໃນບັນດາບັນຫາຄື: ຕ້ານການເຜີຍແຜ່ອາວຸດລ້າງຜານ, ການກໍ່ການຮ້າຍ, ອາດຊະຍາກຳຂ້າມຊາດ, ແກ້ໄຂບັນດາບັນຫາຄວາມໝັ້ນຄົງດ້ານສະບຽງອາຫານ, ພະລັງງານ, ແຫຼ່ງນໍ້າ.

ທ່ານນາງປະທານສະພາແຫ່ງຊາດ ຫງວຽນທິກິມເງິນ ສະເໜີອາເມລິກາ  ພິຈາລະນາ, ຍົກເລີກລາຍການກວດກາປາໜັງຂອງກະຊວງກະສິກຳອາເມລິກາ.

ກ່ຽວກັບບັນຫາປາໜັງ, ທ່ານເອກອັກຄະລັດຖະທູດ Daniel J.Kritenbrink ຢັ້ງຢືນວ່າຈະສົ່ງສານຂອງທ່ານນາງປະທານສະພາແຫ່ງຊາດ ຫງວຽນທິກິມເງິນ ກັບເມືອ ວໍຊິງຕັນ ແລະຮັບປະກັນວ່າບັນດາເພື່ອນຮ່ວມງານຂອງທ່ານເອກອັກຄະລັດຖະທູດຈະໜູນຊ່ວຍເພື່ອໃຫ້ບັນດາຜະລິດຕະພັນປາໜັງຂອງຫວຽດນາມ ຕອບສະໜອງໄດ້ຕາມບັນດາມາດຕະຖານໃໝ່ຂອງອາເມລິກາ, ຍ້ອນ ອາເມລິກາ ມີຄວາມຕ້ອງການກ່ຽວກັບປາໜັງ ແລະນີ້ກໍ່ແມ່ນປະເພດສິນຄ້າສົ່ງອອກສໍາຄັນຂອງຫວຽດນາມ.

ກໍ່ທີ່ການຕ້ອນຮັບ, ທ່ານນາງປະທານສະພາແຫ່ງຊາດ ຫງວຽນທິກິມເງິນ ແລະທ່ານເອກອັກຄະລັດຖະທູດ Daniel J.Kritenbrink ໄດ້ມີບັນດາການແລກປ່ຽນຢ່າງກົງໄປກົງມາ, ເປີດອົກເປີດໃຈກ່ຽວກັບບັນດາບັນຫາຄວາມປອດໄພທາງເຄືອຂ່າຍອິນເຕີແນັດ, ສິດທິມະນຸດເພື່ອໃຫ້ສອງຝ່າຍເພີ່ມທະວີຄວາມເຂົ້າອົກເຂົ້າໃຈເຊິ່ງກັນ ແລະກັນ.

 

ແປໂດຍ: ເຈິ່ນຮວ່ຽນ